El Muséu de Belles Artes d'Asturies espón dendel vienres 12 de febreru la colección completa, un total de 33 obres, de la donación del empresariu ástur-mexicanu Plácido Arango Arias. “El nuestru padre siempres dicía que'l privilexu de qu'estes obres tuvieren nel Muséu de Belles Artes y fueren esfrutaes por toa Asturies yera de so”. Asina afirma, nuna nota unviada al director de la pinacoteca rexonal, Alfonso Palacio, la familia d'Arango, fináu en febreru del añu pasáu. Nun pudieron asistir a la inauguración de l'amuesa, allugada nel palaciu de Velarde, pero fadránlo nes próximes selmanes. En principiu la esposición va poder visitase hasta'l 25 d'abril, anque'l muséu tien previsto ampliala hasta mediaos de mayu

“Toda la ciudad habla de ello”, d'Eduardo Arroyo. | L M.

Alfonso Palacio aportunó nel actu inaugural nel valor de la colección y la importancia que tien pa la pinacoteca asturiana. “Con estes obres vamos tener un muséu más estensu y más intensu”, afirmó. Amás, agradeció a la familia la celeridad na entrega de les obres y que se fixeren cargu de tolos gastos notariales de la donación y tamién del treslláu de les obres dende Madrid hasta Uviéu. 

La esposición qu'agora se puede visitar ye una “reescritura” de la que se celebró en 2018 por cuenta de la donación. Daquella, un total de 21 obres tornaron n'usufructu vitaliciu a manos d'Arango. En morriendo'l donante tardaron menos d'un añu en tornar a Uviéu, talo y como s'alcordara

Tratase d'un percorríu por cinco sieglos de la hestoria del arte n'España, dende, “La Virgen con el Niño y Santa Ana”, atribuyida a Juan de la Abadía El Viejo y datada hacia 1490, hasta la escultura “Balcón con dos figuras” de Juan Muñoz, de 1992. Pente medies, obres como'l “San Agustín”, de Juan de Juanes“El Infante P. Bustos de Lara”, de Francisco de Zurbarán; “El banquete de Ester”, de Francisco Gutiérrez; “Salomé bailando ante Herodes”, de Juan de Valdés Leal; o “Buffalo, Señor de Montmartre”, de Ignacio Zuloaga. Munchos d'esos trabayos salieren d'España y Plácido Arango mercolos pa que tornaren al país, como destacó Alfonso Palacio. 

Palacio señala un detalle de “Nacimiento de la Virgen”, del Círculo de Diego de la Cruz. | Luisma Murias

Agora, el muséu amuesa esa colección completa na planta baxa del palaciu de Velarde, na entrada pola cai Santa Ana. Nel patiu, nel que les parés se pintaron de gris, instaláronse les obres correspondientes a los sieglos XV y XVI. La sala A, a la izquierda del patiu y pintada de color teya, ta dedicada a les pintures del sieglu XVII. Les obres colgaes nestos dos espacios son, en palabres d'Alfonso Palaciu, “una aportación fundamental” a los fondos del Belles Artes. La tercera de les sales acueye les obres de los sieglos XIX y XX con impresionantes obres Eduardo Arroyo o el Equipo Crónica “a les que'l Muséu nun podría aportar enxamás”, reconoció Palaciu. 

La conseyera de Cultura y presidenta del patronatu del Muséu de Belles Artes d'Asturies, Berta Piñán, calificó la esposición de “eventu estelar” y reconoció que “ye difícil atopar na hestoria recién d'Asturies un proceder tan filantrópicu como'l de Plácido Arango” que donó al Belles Artes “una de les colecciones artístiques más importantes del país”. Estos fondos van suponer, aseguró Piñán, que'l muséu asturianu “se convierta nun importante focu d'atracción cultural”. 

El conceyal uvieín Luis Pacho, de Ciudadanos, exerció la representación municipal en sustitución del conceyal de Cultura, José Luis Costillas, que se recupera del coronavirus. Pacho quixo treslladar el “enorme” agradecimientu del Consistoriu a Plácido Arango y a la so familia. “Esta donación pon a Uviéu nun llugar preeminente del arte nacional”, aseguró

20

Inauguración de la esposición nel Belles Artes de les obres donaes por Plácido Arango Luisma Murias

PA VISITAR LA ESPOSICIÓN

L'amuesa puede visitase de martes a vienres de 10.30 a 14.00 y de 16.30 a 20.30 hores, los sábados de 11.30 a 14.00 y de 17.00 a 20.00 y los domingos y festivos de 11.30 a 14.30.