Varapalu xudicial pa la Conseyería de Cultura del Principáu. La sala de lo Contencioso-Alministrativu del Tribunal Superior de Xusticia d'Asturies (TSXA) dictó una sentencia qu'escuaxaringa los planes d'iguar inmuebles históricos na rexón de forma subsidiaria. Ello ye, los propietarios queden llibres de financiar la rehabilitación. Dicho d'otru xeitu, a los dueños de palacios y casones en mal estáu nun se los va poder obligar a restauralos, como plantegara'l Principáu. 

 Pel momento, nun va ser asina na emblemática torre de Soto, declarada Bien d'Interés Cultural (BIC) y allugada na citada localidá ayerana. Ún de los copropietarios llevó a xuiciu a l'Alministración rexonal. La sentencia ye clara: el deterioru de la torre de Soto -casi yá en ruines- deriva de principios del sieglu pasáu y “tienen de ser los poderes públicos” los qu'encaren les sos obres de caltenimientu, apunta'l fallu. Los llabores pa caltener de pies los últimos restos del inmueble tán valoraes en daqué más de 200.000 euros, que depués se diben a reclamar a los propietarios. 

Hasta qu'ún d'ellos dixo “basta” y llegó al TSXA. El copropietariu, que prefier permanecer nel anonimatu, tuvo representáu legalmente pol lletráu Francisco Sánchez. “Llevábamos yá munchos años con esto”, afirmó l'abogáu. Tantos como más d'una década, cuando'l Conceyu d'Ayer arrenunció de los sos planes pa consiguir financiamientu pa esti emblemáticu inmueble. 

La torre de Sotu data de la dómina medieval. Y si les obres tienen un preciu de 200.000 euros, la hestoria del inmueble ye impagable. Cunten, metá real metá lleenda, que foi'l llugar nel que se conocieron y “cortexaron” Alfonso VII y Doña Gontrodo. D'aquel romance extramarital (el rei taba casáu) nació Doña Urraca, que gobernó la rexón como primer Reina d'Asturies. Anguaño, queda de pies un muriu. La reconstrucción del inmueble queda en manos de les semeyes y, na mayoría de los casos, de la imaxinación. 

“Fiximos constar en múltiples ocasiones a l'Alministración que nos paez perbién que se quiera caltener esti inmueble, pero que tienen de ser los poderes publicos los que lu caltengan”, destacó'l lletráu. Asina, per aciu d'escritos oficiales, fixeron llegar al Principáu'l so permisu p'aportar a la finca y “facer los llabores que consideraren necesarios”. Nin una, nin dos. Trés vegaes: en xineru y mayu de 2019, y en xineru de 2020. 

Nun hubo respuesta. “Decidimos aportar a los tribunales porque esti inmueble nun ye una casa o un negociu del qu'el mio veceru pueda sacar un rendimientu. Ye un edificiu históricu y tien de ser el Principáu o otros poderes públicos los que se faigan cargu”, repite l'abogáu Francisco Sánchez. Con esta premisa redactaron la demanda, que'l Tribunal Superior de Xusticia almitió a trámite y agora sentencia al so favor puntu por puntu. El fallu ye firme ya inamovible, contra él nun cueye recursu. 

“Tamos satisfechos porque supón que, a lo último tenemos la razón oficialmente. Anque sabíemos que tábemos no correcto dende va años”, destacó'l lletráu. Los que nun van tar tan satisfechos son los responsables del Gobiernu rexonal, que yá roblaren un conveniu col Conceyu pa entamar les obres de la torre de Soto. Una actuación que se prevía hestórica: sería'l primer arreglu d'un BIC que depués se reclamaría a los sos propietarios. 

Los planes del Principáu queden agora nel aire. Igual que'l futuru d'esti emblemáticu inmueble, que lleva yá dellos años na "Lista roja” de Patrimoniu. Ye un inventariu ellaboráu por espertos qu'avisa d'aquellos inmuebles históricos que tán bien próximos a la ruina y que riquen d'una actuación “urxente”.