El confinamientu pola pandemia vació les cais y empobinó a les persones hacia internet, tamién a los delincuentes. Amás, les empreses echáronse a la rede, col teletrabayu, primando n'ocasiones la eficacia sobre la seguridá. Son les razones que remana'l guardia civil José Ignacio Fernández pa esplicar el “descomanáu” aumentu de los delitos tecnolóxicos nel últimu añu. Esti axente, miembru del Equipu d'Investigaciones Tecnolóxiques (EDITE) adscritu a la Unidá Orgánica de Policía Xudicial de la Comandancia de la Guardia Civil d'Uviéu, asegura que “les empreses convirtiéronse nel principal oxetivu de los ciberdelicuentes”. El “smishing” (estafes al traviés del corréu electrónicu), el “ransomware” (robu de datos) o la estafa del “man in the middle” (“intermediariu”) son los trés delitos más habituales, esplica. Namás pola del "intermediariu”, ocho empreses asturianes sufrieron perdes millonaries nos últimos meses, indica l'axente.
Según Fernández, una de les estafes más habituales a nivel d'usuariu ye'l “smishing”. “Los estafadores unvien un corréu faciéndose pasar por una empresa o un organismu oficial pa facer creer al usuariu que tien un paquete pendiente de recepción o que se-y facilita información sobre'l cobru del ERTE. Van afayándose a la situación. Húbolos rellacionaos cola compra de fociqueres, cuando taben escases. D'equí a poco van empezar los mensaxes rellacionaos cola declaración de la renta, o l'alministración de les vacunes. Piden al usuariu qu'aporte a una páxina pa confirmar los sos datos bancarios o personales. A la fin, termina activándose ensin sabelo una transacción o se facilitaen datos colos que nos vacíen la cuenta”, esplica.
Otra modalidá qu'empieza a facese habitual ye la estafa del falsu técnicu de Microsoft, que “pide activar un programa antivirus d'accesu remotu, lo qu'abre la puerta del ordenador, que queda bloquiáu. Pol arreglu, piden una cantidá de dineru, colo que pretenden entrar na nuesa cuenta online y dexanosla a cero. Cuando asocede daqué asina ye esencial formatiar l'ordenador, porque esi programa de control remotu sigue nel ordenador”, indica.
Depués tán les diverses modalidaes de les "cartes nixerianes”, llamaes asina porque los especialistes nesti tipu d'estafa vienen de países del golfu de Nixeria. “Ta'l falsu coronel d'Estaos Xuníos que pide una cantidá pa lliberar una fortuna robada a Sadam Hussein o la variante del falsu príncipe herederu”, señala. Estos estafadores suelen utilizar la baza del romance pa goberniar al so antoxu a les víctimes, como nel casu d'una vecina d'Uviéu que perdió 100.000 euros en siendo engañada por un falsu militar americanu.
Polo que se refier a les empreses, una de les estafes más habituales ye'l “ransomware” o secuestru de datos, al traviés d'un virus. “Los estafadores piden rescate en bitcoins. Afortunadamente, n'España nun se vieron comprometíes infraestructures vitales como hospitales o organismos públicos. Nestos casos encamiéntase tener copies de seguridá y nun pagar, porque facelo nun asegura que vaigan facilitar la contraseña que nos dexe desencriptar l'ordenador”, indica.
Les empreses sufren sobremanera ataques que comprometen el corréu electrónicu (o BEC). L'habitual ye'l del falsu CEO (iniciales de “chief executive officer”, director executivu), “nel que se suplanta la figura del director xeneral o máximu responsable de la empresa pa convencer al director comercial pa que faiga un pagu discretu”. Sofisticóse tanto que los estafadores pueden suplantar la voz de los directivos.
Pa lluchar contra estos delitos, la Guardia Civil d'Uviéu cunta con permunchos axentes. Cada equipu de Policía Xudicial de cada compañía tien ún o dos especialistes en delitos tecnolóxicos, y na Unidá Orgánica de Policía Xudicial de la Comandancia hai un Equipu d'Investigaciones Tecnolóxiques (EDITE) que trabaya a comuña colos grupos de Patrimoniu y Persones. L'EDITE cuenta con clonadores pal volcáu de discos duros y equipos UFED pa volcar el conteníu de teléfonos móviles, tablets o dispositivos portátiles. Si fai falta una investigación más especializada recurrese al Grupu de Delitos Telemáticos de la Unidá Central Operativa (UCO) o a la Unidá Técnica de Policía Xudicial, en Madrid.
Tocantes a los conseyos, Fernández encamienta sobremanera “prudencia y sentíu común, que son el meyor antivirus. Hai que decatáse de los mensaxes, sobremanera si lleguen cola palabra 'urxente’ o ‘cobru de ERTES’. Nun tien d'abrise nengún corréu sospechosu, tiralu directamente. Nun hai qu'utilizar los links que nos manden nun corréu. Nun hai que facilitar datos personales nin bancarios, tampoco descargar aplicaciones de repositorios que nun sían oficiales”. Pa les empreses aconseya “back up”, “copies de seguridá, que ye lo que nos va a salvar la vida”. Según esti axente, una de cada dos empreses atacaes con ésitu volverán selo d'equí a poco.
