Ediciones Trabe ta acabantes editar la novela xuvenil 'Xurde Amante y el club de los valientes', de Lluis Portal Hevia. Trátase de la segunda novela xuvenil que publica, depués de 'Pelegrinos del abismu' (2010).

El llibru narra la historia de tres collacios que formen el grupu del Club de los Valientes col oxetivu de "desfacer entuertos". "Nun van tener qu'esperar muncho pa que-yos salgan desapaiciones y otros misterios pa resolver", indiquen dende la editorial.

Lluis Portal Hevia (Villaviciosa, 1964) ye periodista profesional con munchu llabor en distintos periódicos. Nestos momentos, coordina xunto Xuan Pedrayes la revista cultural n'asturianu 'Friuz', fundada nel 2016. Ganador nel 2011 del Premiu 'Máximo Fuertes Acevedo' d'Ensayu col trabayu Cipriano Folgueras, una gloria d'Asturies (2012). Amás, tien publicaos llibros de distinta factura, según informa EUROPA PRESS.