Recrear en 3D güesos de pacientes pa ensayar y diseñar la so operación enantes de pasar pel quirófanu. L'Hospital de Cabueñes ta dando los primeros pasos p'afitar en Xixón un sistema hasta agora pioneru n'Asturies, al traviés de simulaciones virtuales y reproducciones en trés dimensiones, pa preparar operaciones ósees complexes y evitar posibles imprevistos en quirófanu. La idea, adelantren los sanitarios, ye que'l proyectu pueda estendese a bona parte de les especialidaes médiques implicaes d'una forma o otra na reconstrucción ósea por ciruxía. El plan yá tien el vistu bonu de la xerencia sanitaria y los profesionales fixeron les sos primeres pruebes va unes selmanes. “Ye un pasu alantre na medicina 4.0; ye realmente'l futuru del nuesu trabayu”, aplauden

Los profesionales al mandu del proyectu espliquen qu'hasta agora'l plan ta centrándose nes ciruxíes de columna, que pola so gran complexidá son les que más riesgu tienen de cara a producir daños o dexar güelgues nel paciente. La idea, sicasí, ye que'l proyectu s'esparda “como un serviciu tresversal” a toles árees quirúrxiques interesaes. Por exemplu, yá se ta ensayando la so utilidá con especialistes del área de Maxilofacial pa reconstrucciones de la cara. “En realidá, poder tener un fantoma quirúrxicu, que ye como se llamen estes reconstrucciones, resulta útil pa casi cualquier tipu d'operación. Lo especial d'esto ye qu'agora podemos tener un fantoma bien esactu de cada paciente y empobináu a una operación concreta. El procedimientu ye'l mesmu, pero individualizáu”, razona'l traumatólogu Ánxel Piñera

L'hospital yá tien una imprentadora 3D cola que pueden estrayese modelos bien realistes, casi esactos, del güesu o estructura del paciente que se va a operar. El modelu llógrase con información estrayida d'escáneres y prebes d'imaxe de la mancadura del afectáu –tienen de ser lo más recién posible, porque l'anatomía del paciente puede variar llixeramente col pasu del tiempu–. La recreación resultante puede vese en trés dimensiones dende l'ordenador o en formatu físicu si s'imprime. Sobre esi modelu, l'equipu puede ensayar y diseñar la intervención a acometer, y amenorgar les posibilidaes d'atopase con dalguna sorpresa en quirófanu. “A la fin, p'hacia onde empobinamos ye a la medicina especializada, la llamada medicina 4.0. Cuando'l proyectu avance vamos tener una idea muncho más concreta y en formatu físicu, bultable, del procedimientu quirúrxicu que vas facer”, prosigue Piñera. 

Proyectos como'l de Cabueñes cúntense inda n'hospitales d'España colos deos d'una mano y solo dellos complexos sanitarios de referencia como'l Gregorio Marañón de Madrid tienen un serviciu específicu y esperimentáu nesti tipu d'abordaxes. La técnica, esclarien dende l'hospital xixonés, ta empezando a probar agora la so utilidá nel campu médicu, polo que s'espera que sían los sanitarios xixoneses los qu'impulsen y lideren la recreación 3D sanitaria n'Asturies. El llaboratoriu, pel momento “humilde, con unos ordenadores y una imprentadora”, empezó a conformase'l pasáu mes d'ochobre, y fixo los sos primeros ensayos un poco primero de Navidá. L'oxetivu ye desenvolvelutou esti añu y comprobar lo afayaízo que ye a la d'instalar prótesis o realizar reconstrucciones ósees más complexes primero d'ampliase. “Hasta agora tamos centrándonos nes ciruxíes de columna, porque ende l'anatomía tamién ye más crítica pa la seguridá del paciente si surde un erru na posición, pero sí creemos que podría ser útil pa casi cualquier operación”, completa Piñera. Al pie d'él, collaboren nel proyectu profesionales de Radiodiagnósticu, de Traumatoloxía, d'Oncoloxía y de bona parte de les especialidaes quirúrxiques que traten mancadures del güesu.