“La durez de la crisis obligónos a camudar aquellos planes que pensábamos que yeren los meyores pa esta celebración, pero tamién a aunir esfuerzos y poner más imaxinación pa nun perder de vista la oportunidá que nos daba'l Xacobeo pa visibilizar el patrimoniu mundial esencial d'Asturies. Tou'l nuesu patrimoniu”. Con estes palabres, pronunciaes orixinalmente n'asturianu, presentó la conseyera de Cultura, Política Llingüística y Turismu, Berta Piñán, l'amuesa “La ruta de les estrelles. El Camín de Santiago na Edá Media”. Una esposición accesible y bien didáctica que, nel so actual allugamientu, establez un granible diálogu col arte de la Monarquía Asturiana. Y ye que l'amuesa puede visitase hasta'l próximu 30 d'abril, nel Centru d'Interpretación del Prerrománicu Asturianu, que s'alcuentra na falda del Naranco, nes proximidaes de Santa María. 

Producida pol Muséu d'Hestoria Urbana d'Avilés y comisariada por José Antonio Álvarez Castrillón, “La ruta de les estrelles” propón un acercamientu a la xénesis y el desenvolvimientu de la vía santa al traviés d'ocho paneles que contextualicen el fenómenu relixosu de les pelegrinaciones y el so impactu cultural. Los paneles, perbién documentados y ricamente ilustraos, dedíquense sucesivamente a: La pelegrinación, Les reliquies, Los pelegrinos, El tresporte del pelegrín, Albergues y hospitales, Devociones, El Camín Primitivu y El impactu. 

P'ayudar al visitante nesti percorríu, los paneles inclúin una esplicación sobre la tema tratada y un arrogante apartáu gráficu qu'incorpora dende planos urbanos y reproducción de miniatures medievales hasta fotografíes, tanto actuales como antigües. Un repertoriu d'imaxes pal que los impulsores de l'amuesa cuntaron cola collaboración de Doculab, el Llaboratoriu de documentación histórica de la Universidá d'Uviéu. 

Na presentación, flanquearon a Berta Piñán el comisariu, José Antonio Álvarez Castrillón, el director del Muséu Urbanu d'Avilés, Manuel Ángel Hidalgo Menéndez, la historiadora y cronista oficial d'Avilés Josefa Sanz, y Clara García, coordinadora del Centru d'Interpretación del Prerrománicu. L'alcaldesa d'Avilés, Mariví Monteserín, escusó la so asistencia por cuenta de que la presentación coincidía cola sesión plenaria na que s'aldericaben los presupuestos del Conceyu d'Avilés pa esti añu.

En completando una visita a l'amuesa empobinada por José Antonio Álvarez Castrillón, Berta Piñán destacó'l so calter "escelente” y una accesibilidá que facilita'l percorríu tantu al públicu en xeneral como a un visitante con formación histórica, y ensin arrenunciar en nengún casu al rigor. 

Con vistes al restu d'actividaes que ta impulsando'l Principáu pa celebrar el Xacobeo 21, Piñán aportunó nel so interés por formalizar un "tratamientu tresversal” que “integre a tolos axentes” ya incidiendo nel protagonismu d'Uviéu, anque ensin arrenunciar por ello a esparder les actividaes al restu del territoriu rexonal. “Desenvolvemos un programa potente, anque evidentemente acutáu pola evolución de la crisis de la pandemia”, reivindicó Piñán.