El proyectu de Bayer pa fabricar un nuevu principiu activu d'usu farmacéuticu na so planta de Lada llogró'l vistu bonu de la Comisión d'Asuntos Medioambientales d'Asturies (CAMA). La revisión de l'autorización ambiental integrada de les instalaciones llangreanes solicitada pola multinacional químico-farmacéutica alemana recibió lluz verde del órganu rexonal na xunta celebrada el 26 de febreru

El resolvimientu d'esti espediente, afirma'l Principáu, supón “una meyora pa los proyectos d'inversión de la empresa”. Nel cambéu autorizáu plantégase, sostien, “l'adaptación a les meyores técniques disponibles nel tratamientu de gases y agües residuales”. 

La planta de Bayer en Llangréu, de la que sal el 100 por cientu del ácidu acetilsalicílicu col que s'ellabora tola producción mundial de la Aspirina, va fabricar d'equí a poco seis principios activos tres la incorporación del nifedipino. Nestos últimos años producíase n'instalaciones de Bayer n'Alemania pero va treslladase al centru llangreanu. Na factoría de Lada yá se fabricó mientres venti años, ente 1981 y 2001. 

El nifedipino (usáu pal alliviamientu de l'anxina de pechu, y tamién pa la hipertensión arterial y pa otros usos) va producise aprovechando los equipos esistentes na planta multiusu que s'utilicen pa la fabricación d'otru principiu activu, clotrimazol, un antimicóticu. Na documentación presentada por Bayer ante la Conseyería d'Alministración Autonómica, Medio Ambiente y Cambéu Climáticu, qu'abrió'l pasáu branu'l periodu d'esposición pública pa esaminar el proyectu, reflexa que nun va facer falta ampliar les instalaciones. 

La producción de nifedipino prevista pola multinacional alemana pa la factoría llangreana asitia nuna forqueta d'ente 20 y 100 tonelaes al añu, dependiendo de la demanda. El principiu activu de mayor producción de la planta en Lada ye l'ácidu acetilsalicílicu por mor de que d'ella sal tol ácidu acetilsalicílicu emplegáu darréu na ellaboración del popular fármacu (Aspirina) en cinco factoríes espardíes per Europa, América y Asia. Cada segundu consúmense 2.500 aspirines nel mundu. 

L'ácidu acetilsalicílicu llograse en Lada del amiestu del ácidu salicílicu (sólidu) y l'anhídridu acéticu (líquidu). L'ácidu salicílicu ye otru compuestu que se produz nes instalaciones a partir de la reacción de fenol, hidróxidu sódicu y anhídridu carbónicu, mentantu que l'anhídridu acéticu mércase a grandes firmes químiques y petroleres. 

En Lada produzse ácidu acetilsalicílicu dende 1942, cuando les empreses industriales Duro Felguera y Esplosivos Riotinto y dellos bancos constituyeron la Sociedá Productos Químicos Sintéticos. Darréu pasó a denominase namás Productos Químicos Sintéticos (Proquisa) y adquirióla Bayer en 1969. Na planta llangreana tamién se fabrica'l butafosfán (un estimulante del metabolismu d'usu veterinariu) y un principiu activu d'un antiparasitariu pa mascotes, imidacloprid. A estos cinco principios activos d'usu farmacéuticu va xunise'l nifedipino. 

La inversión de Bayer na so planta de Llangréu medró pasu ente pasu nos postreros seis años. De los trés millones d'euros destinaos en 2015 pasó a 3,5 millones al otru añu y a 4 millones en 2017. Nel exerciciu posterior (2018) la multinacional alemana apurrió 4,5 millones mentantu qu'en 2019 xubió a 6 millones d'euros. La inversión del añu pasáu foi asemeyada a la del exerciciu precedente, colo que s'asitió en 27 millones d'euros nos postreros seis años. Nes instalaciones que tien la compañía farmacéutica en Lada trabayen anguaño un centenar d'emplegaos, que xuben a 150 sumando les subcontrates. Na península Bayer tien 2.200 trabayadores.