Lo ideal pa garantizar el futuru de les pintures rupestres de la cueva de Tito Bustillo sería “estudiar el covarón ambientalmente” y determinar, según les resultancies, el númberu de visitantes diarios, en cuenta de tener un cupu fixu como norma xeneral. Apúntalo ún de los guardes y guíes del covarón, Santiago Calleja, qu'esti dia recibía a los primeros visitantes de la temporada 2021.
“Sería interesante tener mididores funcionando porque la cueva y les sos característiques diaries pueden dicíte'l númberu de persones qu'almite”, abonda. D'esa manera, “podría asoceder qu'un día, anque haya previstes 150 persones, cola entrada de los primeros 70 visitantes se tengan que cortar les entraes”. Eso, “implicaría un llabor d'información bien importante per parte de l'Alministración” pa educar a la ciudadanía y almitir que l'accesu a la cueva ta suxeto a les condiciones de la mesma.
Los datos de cuántos pueden pasar daríenlos los mididores que controlen la temperatura o el mugor. “Llegaos a unos determinaos baremos, si cortamos, nun s'alteriaríen significativamente les condiciones ambientales del interior. Si nun curiamos esto, dientro de 50 años seique nun pueda entrar naide a ver les pintures. Pero si llogramos un equilibriu ente la preservación y la divulgación, taríemos quiciabes garantizándolo”, defende'l guía.
Esti añu les pintures notaron que'l pasáu 2020 hubo un descensu nes visites por cuenta de la llimitación d'aforos qu'impunxo la crisis sanitaria. “Cada cueva tien una forma distinta en función de les condiciones del esterior, dellos díes les parés ‘suden’ si entra muncha xente. Otres vegaes, na área del entronque, una zona amplia antes de llegar a les pintures, puede vese nublina. L'añu pasáu nun la hubo”, sorraya'l guarda. “Eso ye por cómo alienda la cueva en función de la temperatura esterior y la interior. La nuesa presencia ye negativa porque xeneramos calor y anhídridu carbónicu, anque la cueva ventila, lo que tenemos qu'intentar ye llograr l'equilibriu pa que la nuesa presencia nun alterie demasiao les condiciones ambientales”, aportuna. La cueva notó'l descensu de públicu del pasáu añu. “Vese, pero nun podemos concretalo porque nun esisten esos mididores, lo que nos torga establecer criterios”, diz.
Esti día, na entrada prevista pa les once de la mañana, namás había dos visitantes, Pedro Villa y Sara González, dos estremeños afincaos n'Avín (Onís). “Nun pudimos venir en 2020 por motivos llaborales y esti añu, en xineru, mercamos na web les entraes pa que nun nos pasara lo mesmo”. A la salida, celebraben “lo maraviyoso de les pintures” y “lo increíble de que se caltengan d'esta forma, que pudieren pintar a escures, con aquellos medios que teníen, resulta estelante realmente”, esplicaron.
El relevu tómenlu na segunda tanda de visites, a les 12:30 hores, Tomás Bobes y Celia Van Berkum, dos holandeses que viven en Triongu y consideren que “hai que conocer l'orixe de too y afayar la cultura que tenemos cerca”. Por eso consideren “Tito Bustillo un imprescindible” na contorna oriental que tendría que se visitar, siquier, una vegada na vida. Al pie de ellos aportaben dos riosellanos, Marina Fernández y Avelino Rosete, qu'entraron “va unos cuantos años y teníen ganes de remembrar lo preciosa que ye” la cueva riosellana.
