“Nun ye por faceme'l llistu, pero cuando va dos años s'empezó a falar de que Duro Felguera taba en dificultaes yo yá-y dixi a la xente que nun s'esmoleciera, qu'esta empresa nun diba cerrar, que nun diba sumir. Esta ye solo una etapa más, van cinco o seis iguales. Ye otru ciclu”. Manuel Terán Sánchez, autor del pronósticu, dexó buelga na hestoria de la empresa d'inxeniería asturiana, que va recibir 120 millones del Estáu español (seis d'ellos va ponélos el Principáu) pa ser rescatada y poder siguir con vida. Foi sindicalista de CC OO y voceru de los trabayadores de la empresa asturiana qu'acabaron zarrándose 318 díes na torre de la Catedral d'Uviéu. Esti 2021 pospandémicu cúmplense 25 años d'aquel encierre. Ello ye, pasaron dos décades y media ente dos de les catarsis que vivió esta compañía industrial. Dos momentos na so hestoria nos que –por dellos motivos, anque Terán sostién que nun son tan distintos– la compañía y los sos trabayadores tuvieron al esmucir pel forfugón. A la fin llogró resucitar. “Ye daqué cíclico”, aportuna Terán, “siempres ye la mesma estratexa”.
En metá de la plaza de la Catedral d'Uviéu, Ramón Cimadevilla saca'l móvil del bolsu y empieza a pasar semeyes. Nes imaxes hai trenes amburando, protestes multitudinaries y semeyes de trabayadores de Duro engolaos a lo cimero de la Catedral. Él mesmu pasó ellí más de cien díes zarráu, en fuelga, pa intentar aparar el despidu de centenares de los sos compañeros. “Esa foi delantre de la Xunta”, comenta Juan Manuel Corujo. Na imaxe hai un coche ente llapaes. Corujo trabayaba en Felguera Melt, una de les filiales de Duro, y tuvo 52 díes en fuelga de fame dientro del Ayuntamientu de Llangréu, tamién pol mesmu motivu. L'oxetivu yera aparar un espediente de regulación d'empléu qu'incluyía'l despidu de 150 trabayadores. “Xustamente esti día cumpliéronse 27 años desque llevantamos aquella fuelga. El día que díbemos salir había xente na plaza del Conceyu dende les ocho de la mañana. Había munchos que veníen sofitanos, pero tamién munchos curiosos”, resalta. Esta vegada ye él el que saca'l móvil y amuesa una imaxe d'aquel día. Taba atarraquinao.
Terán recuerda aquellos años de tensión na empresa y nes cais con una precisión de ciruxanu. Tou aquello dexó-y factures físiques y de salú, reconoz. La presión yera bien alta. Llegó a tener a la escontra a la dirección de la empresa, a los gobiernos y a los mesmos sindicatos. Pero había un grupu importante de trabayadores que-y yera bien fiel. Los problemes llaborales de la compañía agraváronse en 1989. Esi añu Duro plantega un espediente d'estinción al que'l comité d'empresa opónse dafechu. P'atopar una salida, recuerda Terán, la empresa intenta buscar un inversor esternu, mesmo que ta faciendo agora. Pero aquello nun acabó bien. “Convocáronnos nel salón de bodes d'un hotel de Candás pa presentanos un proyectu pantasma, vieno un tipu de traxe blancu, mui morenu y que tenía un yate en Marbella”, recuerda Terán. El proyectu en cuestión bautizóse como “Eurometals”, una empresa que prometía meter a Duro nel negociu de l'aeronáutica. Quedó too en nada. L'empresariu coló y Duro Felguera siguió a lo suyo. “Tuvimos dellos años salvando la bola de partíu, frenando l'espediente de regulación”, diz Terán.
Asina llegaron a una fuelga de fame qu'acabó con cinco trabayadores de Duro Felguera zarraos nel salón de plenos del Ayuntamientu de Llangréu 52 díes. Foi a empiezos de 1994. Un añu enantes les protestes endureciérense, empezaron les quemes de caxeros automáticos y la llucha nes cais ente una parte de la plantiya de Duro y centenares d'antidisturbios. “Tuvi amenaces hasta del mio sindicatu diciéndome que yera responsable de qu'aquella xente en fuelga enfermara”, diz Terán. “Daquella di una rueda de prensa na que digo que si ún de los mios compañeros se pon enfermu yo lu sustituyo, y depués d'eso asocede daqué ablucante, llamáronme unos cures pa dame sofitu”, recuerda. Esa llamada derivó en que 44 relixosos roblaren un manifiestu pidiéndo-y al arzobispu Gabino Díaz Merchán qu'interviniera pa intentar aparar el conflictu. De primeres Merchán foi escépticu, pero acabó adondando ya inclusive Terán acabó regalándo-y un “gomeru” como amuesa d'aquella llucha obrera. Los trabayadores llegaron a encadenase a la rexa de la cueva de Cuadonga nun Día d'Asturies. “Merchán llamóme al despechu, llevé-y unos documentos, analizólos y díxome: puede que tengáis razón”, señala Terán. La resurrección taba en marcha.
Aquella fuelga de fame derivó nun alcuerdu pol que Duro se compormetió a recolocar a los trabayadores afectaos polos despidos. Pero dos años depués, y fartos d'incumplimientos, los emplegaos, yá col respaldu de la Ilesia, atoparon abrigu na torre de la Catedral. Ellí llevaron les sos protestes con un encierre de 318 díes.
La crisis actual de la compañía ye bien distinta, pero non tanto, según Terán. “Na nuesa dómina esmuciéronse 17.000 millones de pesetes; pos agora pasó daqué asemeyáo”, diz. Corujo asegura sobre'l rescate que “Duro sigui especulando, y esta nun ye la solución pa la empresa”. Daqué asemeyao opina Cimadevilla, que reclama inclusive poder recuperar parte del patrimoniu que Duro foi abandonando, como'l local d'asociaciones del colexu de La Salle en La Felguera”. Mentantu, l'Estáu aprueba una nueva resurrección pa Duro.
