Si los proyectos d'enerxíes anovables que se remanen n'Asturies salen adelantre cola inyección de fondos europeos, l'hidróxenu "verde” ta llamáu a ser el nuevu carbón. Empreses eléctriques, gasistes, mineres, d'inxeniería y de tresportes plantegaron yá na rexón 24 proyectos valoraos en 3.200 millones d'euros en tola cadena de valor del hidróxenu "verde”, dende la producción al consumu industrial, pasando pola fabricación de componentes pal so llogru, la distribución, l'almacenaxe, l'usu pal tresporte o la esportación. 

L'hidróxenu emplégase como combustible dende principios del sieglu XIX y el “boom” que ta esperimentando agora ta venceyáu a la "Estratexa del hidróxenu pa una Europa climáticamente neutra” que promueve la UE con unos oxetivos ambiciosos: algamar en 2030 los 40 xigavatios, más que la potencia asitiada n'España n'eólica y fotovoltaica xuntes. Europa quier hidróxenu y como tien el grifu pa financiar la transición enerxética xeneró un tabayón de proyectos. Somorguiase nel hidróxenu rique remanar el so vocabulariu. Tou asturianu sabe lo que ye una caldera, una carbonera o una escombrera. Agora tien de saber lo que ye un electrolizador, una pila de combustible o una hidroxenera.

¿Qué ye l'hidróxenu? 

Ye'l más llixeru de los elementos químicos y el más abondosu na naturaleza. En condiciones normales atopámoslu n'estáu gaseosu y ye insípidu, incoloru y inoloru. 

¿Ye una fonte d'enerxía?

 Nun ye una fonte d'enerxía primaria como'l carbón, l'aire o'l sol, pero sí fai la función de portador d'enerxía, como una batería. En realidá ye un vector igual que la eletricidá, que dexa utilizar la enerxía contenida en fontes fósiles o anovables pa, por casu, encender una bombilla.

¿Tien impactu ambiental l'hidróxenu? 

Depende de la fonte d'enerxía utilizada pa llogralu. Anguaño más del 90% del hidróxenu consumíu produzse a partir de combustibles fósiles. Por exemplu, ArcelorMittal úsalu nún de los sos fornos altos de Xixón, pero llogralu a partir de gases de les bateríes de coque. Anque ye una meyora n'economía circular sigue habiendo emisiones. Si pa producir l'hidróxenu solo s'usen enerxíes anovables, yá nun hai arramaos de gases d'efectu invernaderu. Ye l'hidróxenu verde pol qu'apuesta la UE.

¿Cómo se llogra l'hidróxenu verde”? 

Hai dellos métodos, pero en tolos proyectos que se remanen n'Asturies s'utiliza'l procesu químicu conocíu como electrólisis. Esti métodu usa la corriente eléctrica pa descomponer molécules d'agua (H2O) n'osixenu (O2) ya hidróxenu (H2). El procesu faise nun electrolizador y necesita importantes volumes d'agua abondoso n'Asturies– y, sobremanera, d'enerxía anovable –por eso los proyectos que se plantegen na rexón venceyaos a la instalación de grandes parques eólicos terrestres y marinos flotantes, y a plantes fotovoltaicas–. Una forma de rebaxar l'aportación enerxética ye faciendo la operación a temperatures elevaes y poro disponer d'una fonte de calor residual procedente d'otru procesu industrial ye una ventaya. D'ende que dellos de los proyectos que se plantegen n'Asturies tean venceyaos a térmiques y a la gran industria.

¿Ye una tecnoloxía competitiva en precios? 

Na actualidá, l'hidróxenu anovable nun ye competitivu en términos de costos frente al hidróxenu d'orixe fósil. Según estimaciones de la Comisión Europea, los costos actuales del hidróxenu d'orixe fósil asítiense alredol de 1,5 euros/kg ensin tener en cuenta'l costu de les emisiones de CO2. Pela so parte los costos del hidróxenu anovable son d'entre 2,5 y 5,5 euros/kg. Sicasí, la Comisión Europea destaca que tán baxando rápido. El costu de los electrolizadores rebaxó un 60% nos postreros diez años y espérase que caya a la metá en 2030 en comparanza col actual. En rexones con eletricidá anovable barata, espérase que los electrolizadores puedan competir col hidróxenu fósil en 2030.

¿Qué usos tien?

 L'hidróxenu "verde” ye una solución clave p'amenorgar les emisiones de gases d'efectu invernaderu en sectores que son difíciles de descarbonizar y nos que la electrificación ye complicada o imposible. Ye'l casu de sectores industriales como la producción d'aceru (de la que n'Asturies dependen 5.000 puestos de trabayu directu) o'l tresporte pesáu. Como vector enerxéticu ensin carbonu, l'hidróxenu tamién permite'l tresporte d'enerxía anovable a llarga distancia –puede entemecese col gas natural hasta nun 20% y viaxar peles sos mesmes redes– y l'almacenamientu de grandes volumes, lo que dexa resolver la intermitencia de parte de les anovables.

¿Cómo puede ayudar a descarbonizar la siderurxa? 

Sustituyendo los combustibles fósiles na fabricación d'aceru. Pasando del coque al hidróxenu verde.

¿Y el tresporte pesáu? 

L'hidróxenu ye una opción prometedora cuando la electrificación ye difícil. Por casu, n'autobuses urbanos, en flotes de camiones o en tramos de rede ferroviaria ensin catenaria. Nesos casos l'hidróxenu funciona como combustible y los repostaxes faense n'estaciones de serviciu denominaes hidroxeneres (en Siero proxectóse la primera d'Asturies). L'hidróxenu almacenase nos vehículos y faise reaccionar con osíxenu nun dispositivu denomináu pila de combustible que ye como un xenerador d'eletricidá que fai mover l'autobús, el camión o'l tren. El primer vehículu ferroviariu del mundu movíu por hidróxenu foi'l “Fabiolo”, desenvueltu n'Asturies, y anguaño n'Alemania yá hai trenes comerciales que lu usen.

¿Ye seguro l'hidróxenu? 

L'hidróxenu ye un gas perinflamable. Sicasí, esisten coches comerciales qu'utilicen dende va años hidróxenu con toa normalidá. A diferencia de la gasolina, l'hidróxenu en casu de que frañe'l depósitu evaporase y tiende a xubir, lo qu'evita vertíos que puedan xenerar quemes. 

¿Y qu'asocede nos túneles? 

El Centru Nacional del Hidróxenu realizó ensayos de dispersión nel túnel de San Pedro d'Anes, en Siero. “Fueron estudios de seguridá pioneros”, destacó Belarmina Díaz, directora xeneral d'Enerxía del Principáu.