La Catedral d'Uviéu zarra hestories en caún de los sos requexos, y munches d'elles cúntenles los sos retablos, que garren agora protagonismu y posiciones al formar parte de la nueva llista de 55 bienes d'interés cultural (BIC), que completa la declaración patrimonial con que cunta la Sancta Ovetensis dende 1931.
En 1985 pasó a tener la consideración de bien d'interés cultural y en 1998 la Cámara Santa incluyóse na llista de Patrimoniu Mundial de la Unesco; en 2015 algamó tal reconocencia'l restu del conxuntu, al ser un elementu venceyáu al Camín de Santiago.
Según la resolución de la Conseyería de Cultura, la selección inclúi bienes del altar mayor, mesmo que de les capiyes llaterales, la Cámara Santa, el Muséu de la Ilesia y la Sala Capitular, les cruces de los Ánxeles (añu 808) y de la Victoria (añu 908) y la Caxa de les Ágates (añu 910) y l'Arca Santa, pero tamién pieces d'orfebrería y dípticos y los retablos alcontraos nes capiyes llaterales de la catedral y na so xirola, de los sieglos XVII y XVIII. Son precisamente estos retablos dalgunes de les ayalgues menos conocíes del templu metropolitanu, o cuando menos con un nivel inferior de “popularidá” respecto de les reliquies de la Cámara Santa.
Seis d'ellos, el de los Vigiles y los de les cinco capiyes de la xirola, de José Bernardo de la Meana, (Uviéu 1715-1790), arquitectu y escultor de la última etapa del barrocu español que mientres 40 años trabayó na Catedral como maestru mayor, acaben de vivir procesos de restauración que devolvieron la rellumanza a la piedra, los doraos y los llenzos.
Na recuperación de los retablos de la xirola trabayaron Pablo Klett, Paula Sánchez, Jesús Puras, Luis Suárez Saro, fináu n'abril del añu pasáu, y Natalia Díaz-Ordóñez Melgarejo, que s'encargó de restaurar la capiya de San Pablo, que cunta cola particularidá d'allugar un llenzu, mentantu nos demás hai escultures.
“La declaración de BIC yera fundamental, hai que desenvolver la llei de Patrimoniu Asturianu y esti ye un pasu importante; a la Catedral, con esa descomanada riqueza cultural, histórica y patrimonial, facía-y falta que s'individualizaren los sos bienes, anque l'edificiu yá ye un bien d'interés cultural nél mesmu”, indica la restauradora, que tamién destaca l'ambiciosa actuación del cabildru, col deán, Benito Gallego, al frente, al impulsar un plan director nel que solo queden pendientes les vidrieres de la parte sur. Natalia Díaz-Ordóñez asitió el color y l'estucáu, llimpió les escultures y trató la madera, estrozaes polos mugores y filtraciones d'agua.
El retablu contién alturrelieves con escenes de la vida del apóstol y nel procesu afayáronse unos rayos que parten dende'l cielu nel llenzu central nel que se representa la cayida de San Pablo del caballu. La recuperación de los retablos de la capiya de la Transfixión, con escenes de la Pasión, corrió por cuenta de Paula Sánchez; la capiya de San Pedro axudicóse a Luis Suárez Saro, ente que les de San Andrés y San Bernardo fueron responsabilidá de Jesús Puras y Pablo Klett, respectivamente.
Na capiya de los Vigiles llimpiáronse les zones renegríes y afectaes pol mugor en techos y parés, que tardaron años n'ensugase tres l'arreglu de la cubierta.
Na capiya de Cuadonga surdió la sorpresa cuando, al retirase'l retablu seudobarrocu y llimpiase les parés encalaes, atopóse la parte de la torre prerrománica de San Miguel y los buecos de conexón qu'había cola Cámara Santa y la cripta de Santa Leocadia.
La capiya de Nuestra Señora del Rei Castu, edificada por orde del obispu Tomás Reluz en 1705, sobre otra fundada por Alfonso II'l Castu nel sieglu IX, alluga otru de los pervalibles retablos catedralicios. Xúntase a la Catedral pela maxestosa puerta de Juan de Malinas, construyida ente 1470 y 1485 n'estilu góticu tardíu. Na nave norte allúgase'l retablu de la Virxe de la Lluz, del sieglu XVI, de la escuela de Juan de Juni.
El retablu de les Llamentaciones, o del Llantu sobre Cristu muertu, asitiáu na Sala Capitular, data del postreru cuartu del XV y formaba parte del monumentu funerariu de Juan de Candamo y de les Tables y de la so muyer, Catalina González de Nava.
Otru de los retablos destacaos ye'l de Santa Teresa, nel brazu derechu del cruceru, de 1739, obra de Manuel Pedrero, Juan de Villanueva y Luis Fernández de la Vega, con intervención nel sotabancu del arquitectu Pedro Muñiz Somonte y de Juan de Fagundiz como dorador.
De xacíu, na llista d'elementos con especial protección al incluyise nel nuevu llistáu de BIC nun falta'l retablu mayor, na capiya mayor, obra del primer terciu del XVI de Giralte de Bruxeles, Juan de Balmaceda, León Picardo y Miguel Bingeles
