El Muséu del Pueblu d’Asturies, en Xixón, recueye nuna esposición fotográfica la vida y los paisaxes d'Asturies de finales del sieglu XIX, reflexaos polos oxetivos d'Edmundo Lacazette y Manuel Gimeno, sol títulu “Una hermandad fotográfica en Asturias, 1891-1901”. “Son fotografíes escepcionales”, esplica Francisco Crabiffosse, comisariu de l'amuesa. Con esta esposición “demuéstrase que la fotografía nel sieglu XIX yera un arte plenu, y con una gran calidá estética y compositiva”, resalta enantes de defender la so importancia y llamentar que la fotografía siempre foi “suburdiada” al respective de la pintura: “Yá ta bien de que'l trabayu de los fotógrafos se tenga por una cosa secundaria o utilitaria”.
Edmundo Lacazette (Uviéu, 1859-1914), d'ascendencia francesa yera un fotógrafu aficionáu, que rexentaba un comerciu n'Uviéu, y que “ta influyíu por una modernidá espresiva nel campu artísticu bien malo d'atopar”. Manuel Gimeno (Madrid, 1850-1922) foi un fiscal de l'audiencia d'Asturies que creó'l primer estudiu de fotografía criminal d'España. “Gracies a esa condición de fiscal tuvo una gran conocencia de toa Asturies pa fotografiar tolos paisaxes”, esplica Cabrifosse.
Na amuesa del Muséu del Pueblu d’Asturies refléxase la influencia que tuvieron nestos dos aficionaos les nueves corrientes estétiques de la fotografía europeo y norteamericano, tantu na interpretación artística del paisaxe como na de la semeya. A lo llargo de 102 fotografíes: 54 en papel (doce son orixinales de Manuel Gimeno y el restu a partir de los negativos) y 48 que se proxecten nuna pantalla.
L'espectador puede reparar en fotografíes de L'Arena, la desaguada del Ríu Nalón, el taller d'esplosivos de Llugones, o requexos de los conceyos de Cuideiru, Proaza, Quirós o Teberga. Lacazette y Gimeno treslladen una mirada personal d'una Asturies d'entesieglos en tresformamientu, novedosa na interpretación del paisaxe rural y urbanu. “Teníen esa capacidá pa saber mirar colos preseos de la vanguardia artística d'aquel momentu”, comenta'l comisariu de la esposición abierta nel muséu xixonés
Juaco López, director del Muséu del Pueblu d’Asturies, resalta la importancia d'esta amuesa, dientro del fin de recuperar les riqueces culturales de la rexón: “Enmárcase nel trabayu de buscar, adquirir, caltener, estudiar y espublizar el patrimoniu cultural y fotográficu d'Asturies”.
