Cola velocidá de los sos 26 años, en pocu más que'l tiempu de la pandemia'l dibuxante llangreanu Guillermo Menéndez Quirós fixo trés llibros d'historietes y "doime hasta'l 31 d'avientu d'esti añu pa decidir si puedo dedicame a ello y ser un autónomu vidable con perspectives de futuru. Intento daqué bien difícil nun momentu bien difícil”. Interesáu pola hestoria, acaba de publicar “Milicias Vascas Antifascistas”, un álbum sobre los vascos nel Madrid sitiáu de la Guerra Civil, solo seis meses depués de “Galdós, un escritor en Madrid”, una novela gráfica sobre la vida del autor de los "Episodios Nacionales” nel centenariu de so muerte y unos meses más tarde que “Leonardo. La epopeya”, que sacó'l Conceyu de Llangréu. 

Llicenciáu en Belles Artes por Bilbao, probó na carrera cola escultura y la pintura espresionista “y dime cuenta de que lo mío yera dibuxar y cuntar con dibuxos, daqué que faigo dende neñu. Lleía ‘Mortadelo y Filemón’ y ‘Tintín’ y dibuxaba les películes que m'ablucaben, de ‘Star Wars’ a ‘Salvar al soldáu Ryan’ ”. Empezó a “facer fanzines en Bilbao con compañeros de Facultá y de fora y distribuyíamos de manera underground. D'ende salió'l personaxe que ta en ‘Leonardo. La epopeya’, qu'arrexunté y completé en 2020”. 

Depués de dos años intentando ganase la vida en Bilbao, volvió a casa en 2018 y llogró, ex aequo, l'accésit de “ArtNalón” en 2019. “Hasta la pandemia di clases particulares de dibuxu. Al tiempu, preparo'l máster de Formación del Profesoráu”. “A Galdós llegué porque Quino Marín pasóme una propuesta qu'Oberon-Anaya fixera a otros ilustradores a nivel nacional, entré nuna especie de concursu zarráu y escoyeron la mio propuesta. Ye una novela gráfica de 125 páxines que tuvi que facer en menos de 6 meses, lo que me fixo simplificar y llevalo a un llinguaxe gráficu senciellu”. 

“ ‘Milicies Vasques Antifascistes’ encamentome facelo en Portugalete en septiembre de 2020 el colectivu ‘Sare Antifaxista’, que fai publicaciones de memoria histórica”. Trátase d'un episodiu de la Guerra Civil compuestu por 15 páxines de contestu históricu y un episodiu de 7 col desenvolvimientu narrativu de los sos dos últimos combatientes, muertos por dióxidu de carbonu, una selmana enantes de la cayida de Madrid. “Prometí-yoslo nun mes, llogrelo en dos. Tardi ye un gran referente nesti álbum. Préstame lo que fai Alfonso Zapico en ‘La balada del Norte’ y gústenme enforma Robert Crumb y Jim Woodring”. Zapico robla un testu na contraportada del álbum. 

Menéndez Quirós, cantautor neofolk, tamién escribe cantares n'asturianu “que falen d'esmoliciones medioambientales y polítiques, pero de manera poética, non de combate”. Tuvo un grupu en Bilbao, “Ogsum”. “Yéramos dos vascos, un rioxanu, un sorianu, un pucelanu y yo. Cantamos lletres n'asturianu en Bilbao y en 8 meses tocamos en Galicia, Llión, País Vascu y Soria”.