A Santi Obaya (Xixón, 1971) siempres-y gustó el monte. Crióse ente edificios, en Xixón, pero cuando'l colexu entamaba escursiones al monte yera un neñu feliz. Obaya yá nun ye un neñu. Tien 49 años y dende fai 8 dexólo tou pa dedicase a lo que güei y agora ye la so pasión y la so manera de vida: les carreres de montaña. N'inglés llámense “trail running”. La suya foi una apuesta d'altor que llegó nel meyor momentu posible. Porque les carreres de monte fixéronse mayores d'edá -tienen presencia n'Asturies dende va18 años- al tiempu que viven una puxanza imparable. Obaya foi pioneru y el testigu perfectu de tola crecedera d'esti deporte

“Pasé de tenelo como un hobby a dexar el mio negociu de siempre y el mio sustentu. Dalgunos dicíenme que taba llocu, pero de lo único que peno ye de nun lo facer primero”, confiesa'l xixonés, guía de monte, corredor y entrenador na compañía “The Bear Outdoor”, en plena forma a los 49 años. Una especie de superhombre que s'entrena seis díes a la selmana. Pesa 58 quilos y mide 1,70 metros

Participantes na pasada edición de la Trevesera

Participantes na pasada edición de la Trevesera Miki López

El xixonés rexentó más de venti años un popular kiosku en Xixón, nel barriu d'El Llano. Primero tuviera col de so padre, na cai Fonte del Real. Media vida vendiendo periódicos. Agora vive dando reblagos pel monte. “Mientres tenga ilusión…”. Por eso la maldita crisis de 2008 foi tamién una oportunidá. “Paselo mal y yera sobrevivir acaldía. Por eso nun lo pensé y llancéme. Dexé'l kiosku. Llevaba tiempu descontentu y la xugada salióme bien”. Y tanto. Obaya, veteranu, ye ún de los principales esponentes de les carreres de montaña n'Asturies, una disciplina que de la mesma tien delles modalidaes. Como'l “Snow cross”, de la que'l xixonés ye campeón d'España en categoría de veteranos. Nes carreres de monte hai veteranos y noveles, homes y muyeres, ya inclusive el covid viéno-y bien a esti deporte porque la xente tiróse al monte tres l'encierre. 

“Enantes de la pandemia n'Asturies entamaben unes 200 carreres al añu y de cuatro años p'hacia equí l'afición disparóse. Cada pueblu de montaña quier tener la so preba. Les carreres entraron como un elefante nuna cacharrería porque la xente víalo como daqué nuevo”, razona Obaya, que da la clave vital sobre la puxanza de correr pel monte. “Ye vida, ye escaecer l'asfaltu por un momentu. Ye poner el cuerpu a la llende. Ye una manera d'esfrutar”. Y lo que diz Obaya compruébse echando una güeyada a un simple entrenamientu

Ye miércoles. Pasen les 15.00 hores na área recreativa de Viapará (Riosa). Pega'l vientu, pero lluz el sol. La vista estela: de llueñe vese Uviéu. Más cerca, El Monsacru y L'Angliru. Oise'l bramar de les vaques, que caminen llibremente pela carretera y pel monte. Casi nun hai naide, sacante una familia con acentu andaluz que se mete pel campu y rápido da la vuelta al ver lo arrimao de la fastera. Santi Obaya (Xixón, 1971) y Xurde Oca (La Pola L.lena, 1996) apaecen llueñe pol horizonte. Van vistíos d'atletes y lleven corriendo pel monte más de trés hores y media. Casi nin suden. Un esfuerzu titánicu pal común de los mortales supón pa ellos un entrenamientu normal, pura rutina. “Güei foi sele”, bromia Obaya. “Caltiense bien”, respuénde-y Oca, que tien 24 años y vive en Xixón. “Un día apunté con un amigu a una carrera. De magar fui a más a más y güei ye un estilu de vida pa mi”, esplica. 

Santi Obaya y Xurde Oca, corriendo pel altu de Viapará Miki López

Nes carreres de montaña hai distintes disciplines. Puede correse inclusive por pareyes. Hai prebes de 10 kilómetros y de media maratón (21.097). Tamién les d'ultradistancia, que consisten en superar los 45. Inclusive hai una modalidá especialmente dura na que se tienen de correr 1.000 metros pindios. “Les de 10 o 20 kilómetros son más esplosives que les superiores a 40, anque eses son más dures. Hai qu'aguantar el ritmu, pero nun ye correr a cencielles. Hai qu'alimentase bien y tener una bona base”, esplica Oca. “A mi camudóme la vida. Conocí xente y fui a vivir a Xixón. Arrodié de xente que se dedica a esto y agora la mio vida ye'l monte”, diz el mozu corredor, qu'estudia Tafad (Técnico Superior en Enseñanza y Animación Sociodeportiva). 

El perfil de los participantes ye variáu. Sobremanera hai homes, anque cada vez se ven más muyeres. N'Asturies cuerren carreres de montaña alredor de 2.000 persones y hai unos 1.300 federaos. Queda muncho que percorrer pa potenciar les carreres de monte. Podría esplotase muncho más como fonte de turismu. Pero les instituciones tendríen d'espurrise. “N'Asturies nun somos conscientes de lo que tenemos. Voi por otres rexones y siento cobicia de lo que veo. Pa correr la Transgrancanaria el Gobiernu de Canaries fixo un decretu p'autorizar la preba de nueche. Equí, n'Asturies, asocede al contrario. Too son torgues y muncha xente nun s'atreve a entamar eventos”, llaméntase Obaya. Mirando escontra L'Angliru, mientres espurre músculos col so pupilu, cavilga sobre'l futuru del monte. “Cada vez se tán arreyando más los mozos. Ende ta la clave de la supervivencia”

La Trevesera, la xoya de la corona N'Asturies


N'Asturies cuérrense innumberables carreres de montaña, pero la xoya de la corona ye ensin dulda La Trevesera. Crucia los trés macizos de los Picos d'Europa. En total percuérrense más de 74 kilómetros y más de 13 mil metros de desniveles. Esti añu va celebrase, anque lo suyo costó. Va correse'l 12 de xunu y va modificase'l plan rector d'usu y xestión (PRUG) del parque nacional, por cuenta de que prohibe les pruebes deportives de nueche. L'asuntu llegó al alderique na Xunta Xeneral tres la presión exercida sobre'l Gobiernu rexonal por vecinos, alcaldes, empresarios, montañeros y deportistes. Santi Obaya ye l'encargáu del marcaxe de la preba. Xuntu col so equipu, tien de poner 3.000 banderes a lo llargo de tol percorríu. “Ayúdenme, nun voi solu”, bromia.

Amás de La Trevesera, tamién ta La Treveserina, hermana menor de la emblemática prueba. Percuérrense 45 kilómetros y 7.000 metros de desnivel acumuláu. Esta preba va celebrase'l próximu 5 de xunu.