José Manuel Fernández, Guti actuó per primer vegada a la gaita en L'Argañosa, n'Uviéu, en 1979. Al tambor taba Manuel Cordera, “Churrina”. Pasaron más de cuatro décades y Guti sigue tocando cientos de melodíes qu'agora afiguró nun llibru, “A bail.lar. Partitures de gaita y tambor p’acompañar el baille”. Ye un percorríu vital pero tamién una tabla de salvación pa los gaiteros del sieglu XXI. En toos estos años Guti vióse tocando composiciones de les que nun esistía nenguna partitura, tresmitiérense d'oyíu y naide s'aparara a reproduciles sobre un pentagrama. Na so esperiencia docente'l gaiteru uvieín vivió en munches ocasiones como los alumnos-y pedíen partitures de tal o cual cantar. Él improvisaba y escribíales sobre la marcha, pero col tiempu llegaba otru alumnu que-y pidía lo mesmo.

Agora yá tienen un manual de too eso que nun taba escrito, un total de 112 partitures que pa Guti “son un salvavides porque agora cualquier gaiteru puede tocar cualquier cantar ensin tener que tirar d'oreya”. Amás, apuntó, “los gaiteros d'agora tienen estudios y toos saben lleer partitures”. 

El llibru “nun ye un trabayu etnográficu sinón una vida cola gaita al costazu”, afirmó Guti. Ende tán les xotes, saltones, habaneres o muñeires que sonaron en toles romeríes asturianes pero tamién una representación de polques, pasudobles, rumbes o valses que tamién se baillaron en munches fiestes de prau amenizaes pola gaita y el tambor.

El gaiteru sorrayó tamién la importancia de la cultura asturiana y la música tradicional, “un importante sector económicu que puede xenerar puestos de trabayu y riqueza” polo que reclamó “un espaciu dientro de la economía asturiana”.

Enllazaba asina colo qu'apuntara José Manuel Ferreira, presidente de la Cámara de Comerciu d'Uviéu, onde se presentó'l llibru esti martes.

Ferreira apurrió datos prepandémicos sobre la industria cultural p'aportunar en que “la industria cultural ye ún de los sectores de futuru y con un gran percorríu de crecedera n'Asturies”. Asina detalló que de los 303.843 asalariaos qu'había n'Asturies a 31 d'avientu de 2019, 3.703 persones pertenecíen al sector cultural. De los 75.000 autónomos asturianos, 2.371 pertenecíen a la industria cultural, colo que'l sector tenía n'Asturies nesa fecha un total de 6.074 trabayadores, lo que supon un 1,60 per cientu de toos el trabayadores asturianos. Tocantes a l'actividá económica'l presidente de la entidá cameral apurrió datos de SADEI que señalen que l'actividá cultural xeneró nesi 2019 un total de 230 millones d'euros de valor añedíu, un 1,15 per cientu del total. 

“Los datos demuestren la importancia del sector y qu'hai un importante percorríu pa facer medrar eses cifres”, dixo. 

El llibru de Guti ye una constatación d'esa unión ente lo económico y lo cultural, dexó tamién claro José Ángel Llaneza, presidente de l'Asociación de Maestros de Música Tradicional Asturiana, pero aprofió que n'otres comunidaes autónomes esos 3.000 trabayadores de la cultura qu'hai n'Asturies dedíquense puramente a la cultura tradicional. “Llevo años defendiendo les munches posibilidaes que tien la cultura tradicional asturiana y utilizando bien los medios seríemos quien a xenerar bastante riqueza”, concluyó.