El referente de Judith Mediavilla ye Margarita Salas, pero esta neña uvieína, que cumple esti añu los once, quier ser ciruxana cardiovascular. Esti día, Judith Mediavilla taba feliz, enfundada nuna bata del HUCA y percorriendo los llaboratorios del Institutu d'Investigación Sanitaria del Principáu d'Asturies (ISPA).
Judith Mediavilla ye una de los quince alumnos de tola rexón, toos ellos ente los 4 y los 16 años, que resultaron galardonaos nel concursu “Dibuxa una Científica”, entamáu pol ISPA coincidiendo cola celebración del Día Internacional de la Muyer y la Neña na Ciencia, el pasáu 11 de febreru. Esti día, esos quince escolares recoyeron los sos premios y realizaron una visita a les instalaciones del ISPA, y los sos investigadores plantegaron a estos científicos per un día retos y problemes rellacionaos coles investigaciones que se desenvuelven nel centru, y enseñáron-yos cómo se trabaya nos sos llaboratorios.
Los premiaos son: en categoría infantil (4-5 años) Lucía Méndez Castañón, Manuel Pujante Suárez y Sara Iglesias Viña; en 1.er ciclu de Primaria (6-7 años) Ana Mayordomo Pérez, Olga Sofía Borrego Calvo y Ainara Martínez Fernández; en 2.u ciclu de Primaria (8-9 años) Sara Herrero Fernández, Marina Fernández Fernández y Álvaro Fermín Díaz Rodríguez; en 3.er ciclu de Primaria (10-11 años) Laura Santos Fernández, Judith Mediavilla Martín y Eloy Rubiera Nosti; y en Secundaria (12-16 años) Blanca Navarro Bandeira, Elena Vidal y Dafne Sanchidrián Prieto. Toos ellos pasaron pel ISPA pa recoyer el premiu y participar nes actividaes.
La visita sirvió pa reforzar la vocación d'investigadores de dalgunos de los escolares, casu de Judith Mediavilla. Pero inclusive aquellos pa los que les sos perspectives de futuru tán llueñe de los llaboratorios aprovecharon bien una xornada na que conocieron les coraes d'unu de los bastiones d'esi gran polu biosanitariu, conocíu como la "milla de la bata blanca”, que se constituyó en redol al HUCA.
L'entusiasmu de los neños y adolescentes que participaron na xornada yera bultable. Dalgunos, como Marina Fernández, taben cumpliendo un auténticu suañu: “Quiero ser científica desque nací, toi bien contenta”, esplicaba la neña, con unos padres que tamién se dediquen a la ciencia, y que tien claro que la so especialidá preferida ye la zooloxía. “Quiero atopar la cura pa les enfermedaes de los animales”, asegura.
Carmen Santos suaña con ser bióloga marina, a Álvaro Fermín Díaz tíra-y l'arqueoloxía, Sara Herrero suaña con ser profesora... Una vocación distinta crez en caún d'estos estudiantes qu'esti día, enfundaos nes sos bates blanques y verdes, introducíense nos misterios de la investigación sanitaria de la mano de los investigadores del ISPA. Toos ellos col mesmu entusiasmu, trabayando a comuña. Porque como cavilgaba Eloy Rubiera, un neñu que suaña con ser físicu cuánticu: “nun hai nengún trabayu que tenga xéneru, que tol mundu s'anime a facer lo que quiera”.
