La Conseyería de Cultura, Política Llingüística y Turismu va ampliar esti añu les categoríes de los premios n’asturianu cola incorporación de dos gallardones nuevos: el Florina Alías a la meyor traducción al asturianu y l’Enriqueta González Rubín de narrativa p’autores moces y mozos. La convocatoria d’estos dos premios ta prevista pal segundu semestre d’esti añu.

 El Florina Alías, que va tener una dotación de 6.000 euros, ta dirixíu a premiar obres yá publicaes tanto en formatu papel como dixital. El nome del gallardón rinde homenaxe a la poeta y narradora Florina Alías (Cualloto, 1921-Xixón, 1999). La escritora publicó n’asturianu los llibros Señaldaes del Sueve (1980) y Xente de casa (1974). Alías foi collaboradora del doctor García Oliveros na realización del so Diccionario Bable de la Rima (IDEA, 1947), pero fundamentalmente foi una referencia poética de la lliteratura escrita n’asturianu na postguerra. Ganó la Primer Xusta Poética pa Traducción (el primer premiu de traducción de la lliteratura asturiana) de les que convocó l’Asociación d’Amigos del Bable ente 1975 y 1980. Fízolo con una traducción de "Platero y yo", de Juan Ramón Jiménez.

 El premiu Enriqueta González Rubín de narrativa p’autores moces y mozos, menores de 30 años, va tar dotáu con 3.000 euros y la publicación de la obra ganadora. El gallardón debe’l nome a la escritora qu’inició’l xéneru narrativu na lliteratura asturiana. Enriqueta González Rubín nació en Santianes (Ribeseya) en 1832 y morrió en L’Infiestu en 1877. Fermín Canella informa de que publicó en 1864 una novela por entregues na prensa de la época, que nun ta localizada. En 1875 publica la novela Viaxe del Tíu Pacho el Sordu a Uviedo, la primera que se conoz n’asturianu. Dexó otros dos rellatos publicaos, dalgunos testos y dellos poemes, pero desconozse’l conxunto de la so obra. 

Otra manera, Política Llingüística convocó los premios ya conocíos n’asturianu, qu’aumenten la dotación económica pa pasar de los 5.000 a los 6.000 euros y ultima la convocatoria de los Premios Camaretá al Meyor Cantar y Nel Amaro de Teatru Profesional.

Los gallardones n’asturianu que convoca la Conseyería de Cultura, Política Llingüística y Turismu son:

 -Xosefa Xovellanos de novela n’asturianu pa obres de tema y estructura llibres que seyan inédites, non premiaes n’otros concursos y tengan una estensión mínima de setenta y cinco páxines a espaciu doble. Esta ye la edición cuarentena segunda.

 -Xuan M.ª Acebal de poesía n’asturianu pa obres de tema y estructura llibres que seyan inédites, non premiaes n’otros concursos y tengan una estensión mínima de quinientos versos. Esta ye la edición ventésima séptima.

 -Máximo Fuertes Acevedo d’ensayu n’asturianu pa obres de tema y estructura llibres que seyan inédites, non premiaes n’otros concursos y tengan una estensión mínima de cincuenta páxines escrites a espaciu doble. Esta ye la edición ventésima séptima.

 -María Josefa Canellada de lliteratura infantil y xuvenil n’asturianu pa obres de lliteratura infantil o xuvenil —con independencia de que seyan noveles, compilaciones de cuentos, poemarios o obres de teatru— que seyan inédites, non premiaes n’otros concursos y tengan una estensión mínima de doscientos cincuenta versos pa poesía y de trenta páxines a espaciu doble pa los demás xéneros. Esta ye la edición decimocuarta.

 -Alfonso Iglesias de cómic n’asturianu pa obres d’estilu, tratamientu y tema llibres, que puen abarcar el desenvolvimentu d’una historia sola o un conxuntu d’histories. Pa participar habrá presentase un proyectu inicial con una estensión mínima de quince páxines, y les obres presentaes habrán ser inédites y non premiaes n’otros concursos. La estensión total de la obra habrá tener un mínimu de 50 páxines. Ye la edición decimotercera.

-Camaretá al Meyor Cantar pa canciones con lletra en llingua asturiana o en gallego-asturianu. Al premiu van poder presentase cantares de cualquier xéneru con lletra y música orixinal y cantares de cualquier xéneru con lletra orixinal sobre melodíes yá existentes. Nun casu y n’otru, editaes y difundíes al públicu a lo llargo del añu 2020 y hasta la fecha de la convocatoria de la edición presente. Cada solista o grupu musical interesáu va poder presentar al premiu un cantar namás. Esta ye la edición decimotercera.

-Nel Amaro de Teatru Profesional en llingua asturiana o gallego-asturianu pa propuestes teatrales yá estrenaes y representaes en llingua asturiana o gallego-asturianu. Puen optar al gallardón tanto los espectáculos orixinales como les obres dramátiques yá existentes y les versiones o adaptaciones d’espectáculos representaos orixinalmente n’otra llingua. Cada empresa interesada va poder presentar al premiu un espectáculu namás. Nun van poder presentarse propuestes teatrales que quedaren yá finalistes n’ediciones anteriores del premiu. Esta ye la quinta edición.