La Feria del Llibru de Frankfurt, el principal puntu d'alcuentru internacional del sector editorial, va cuntar con presencia de la lliteratura escrita n'asturianu y gallego-asturianu, con actividá propia dientro del programa oficial ellaboráu pol Ministeriu de Cultura pal próximu añu, cuando España va ser el país convidáu d'honor.
La conseyera de Cultura, Política Llingüística y Turismu, Berta Piñán, y la directora xeneral del Llibru y Fomentu de la Llectura, María José Gálvez, caltuvieron esti día una xunta na que tamién se decidió la participación de los escritores en llingua asturiana y gallego-asturianu nos programes d'alcuentros lliterarios en IES, que tienen l'enfotu de fomentar la llectura ente l'alumnáu de Secundaria, y los alcuentros d'autores en llibreríes, dientro del programa “Afinidaes electives”.
Los alcuentros lliterarios n'institutos y centros públicos d'Enseñanza Secundaria Obligatoria pretenden desenvolver el vezu de la llectura y encamentar la movilidá de los creadores col espardimientu de la so obra pela vía d'alcuentros con estudiantes de los lliteratos escoyíos polos institutos.
La Dirección Xeneral del Llibru comprometióse a tar presente nos Alcuentros de Verines que cada añu se celebran en Pendueles (Llanes) en collaboración cola Universidá de Salamanca y a integrar l'asturianu nes sos campañes de promoción.
Gálvez, responsable amás del desenvolvimientu de les biblioteques y el fomentu de la igualdá nel accesu a esti serviciu públicu, dio cuenta a la conseyera de Cultura asturiana sobre la inclusión de les obres publicaes n'asturianu y gallego-asturianu nel catálogu de les biblioteques del Estáu.
