Repoblar les zones rurales de la España balerada gracies a la progresiva implantación de les redes 5G. Esti ye l'oxetivu del proxectu Re-Torna, una iniciativa d'un grupu d'estudiantes de la Universidá d'Uviéu que consiguió asitiase ente los cuatro finalistes del Vodafone Campus Lab, una esperiencia d'aprendizaxe pa desenvolver la capacidá d'innovación de los mozos universitarios. Ye amás un programa de formación online onde mozos de distintes disciplines trabayen n'equipu pa crear soluciones a retos d'innovación de Vodafone. La última convocatoria plantegaba cinco retos que comparten la necesidá d'utilizar la realidá estendida al traviés de 5G. Solo cuatro de los 75 equipos que participen, ente ellos el de la Universidá d'Uviéu, llograron llegar a la fase final.

El proyectu asturianu trata de responder al retu de cómo podría sacase mayor provechu al teletrabayu n'España pa facilitar el movimientu de trabayadores escontra núcleos de menor población. Con esta premisa, los seis estudiantes de la Universidá d'Uviéu desenvolvieron dica agora una páxina web y un vídeu corporativu que va rematar col diseñu y desenvolvimientu de l'aplicación móvil Re-torna. Esta plataforma pretende facilitar que los profesionales, empreses y particulares puedan decidir ónde asitiase y trabayar, de manera que les persones puedan escoyer llibremente onde vivir. 

Ángel Cerrato, unu de los miembros del equipu, sorraya que'l funcionamientu d'esta nueva aplicación va ser bien senciellu. L'usuariu va poder introducir dellos de filtros como por casu la esistencia de centros de coworking, l'allugamientu en sablera o monte y otros parámetros, y en función de les sos preferencies va poder escoyer destín pa teletrabayar. "Cola pandemia rescampló que podemos trabayar dende cualquier puntu d'España. Contamos collaborar colos conceyos p'ayudar a les persones a asitiar en cualquier destín de la España rural", añede. L'ésitu del proyectu, lóxicamente, va depender de resolver el problema de conectividad qu'afecta a munchos núcleos ermos. "La compañía pretende enllantar progresivamente'l 5G y lóxicamente cuanta más demanda haya per parte de los habitantes mayores opciones va haber d'ameyorar la conectividad", sorraya.

El diseñu y desenvolvimientu del proyectu foi posible gracies al trabayu n'equipu d'estudiantes de distintes árees de la conocencia y el so ésitu ye frutu d'una filosofía de trabayu que los llevaba a axuntase telemáticamente trés vegaes per selmana n'horariu nocherniegu pa nun afectar a los sos estudios. Los miembros del equipu son Alfredo Martínez, estudiante d'Inxeniería Electrónica; Irene Prada, de Comerciu y Marketing; Ada Junquera, de Bioloxía; Sandra Rodríguez y Ángel Cerrato, del Doble Grau n'Alministración y Dirección d'Empreses y Derechu, y Javier Labrada, estudiante del Máster n'Inxeniería Mecatrónica. Toos ellos trabayaron n'equipu cola supervisión del profesor Enrique Covián. "Caún de nós apurre al proyectu les sos fortaleces. Unos pa desenvolver la web, otros pal diseñu, dalgunos pa la tema llegal", indica Cerrato.

L'equipu de la Universidá d'Uviéu confía agora en llograr bones resultancies na siguiente fase de presentación del proyectu y de la llínea de negociu. "Tamos al altor de los meyores. El nuesu propósitu ye dar lo máximo y, vaivá, ganar entra dientro lo posible", manifiesta esti estudiante. El Vodafone Campus Lab ta dotáu d'un primer premiu de 10.000 euros, un segundu de 6.000 y un terceru de 4.000. Cada unu d'ellos inclúi tamién trés meses de mentoría p'ayudar a enllantar el proyectu.

Ye oxetivu del nuevu Vicerrectoráu de tresferencia y relaciones cola empresa siguir sofitando esti tipu d'iniciatives.