Los informáticos, los mecánicos y los técnicos de la industria y la construcción constitúin les salíes profesionales que tienen les menores tases de desempléu d'Asturies. Con bastante diferencia, amás, respectu al restu d'oficios. Ye más, el casu d'aquellos que se formaron pa trabayar nel sector de la informática ye desaxeradamente llamativu visto qu'ente esti colectivu solo hai un 3,47% de paru, según les últimes cifres recoyíes pola Encuesta de Población Activa (EPA) que de forma trimestral ellabora l'Institutu Nacional d'Estadística (INE). Prácticamente, plenu empléu. Esti colectivu de profesionales foi totalmente inmune a la pandemia. Mentantu qu'en bona parte de los oficios el númberu de desacupaos diba n'aumentu, nel casu de los informáticos asocedió lo contrario. 

Otros de los que presenten inmunidá a los terribles efectos que la pandemia ta teniendo sobre'l mercáu llaboral son los mecánicos, lletricistes y los técnicos emplegaos na industria y la construcción. La EPA arrexunta a esta heteroxeneidá de profesionales sol mesmu epígrafe y, según les sos cuentes, la tasa de paru ente toos ellos solo llega al 6,68% na rexón. La metá del conxuntu de la tasa de paru asturiano, que ta nel 13,5%. 

Los niveles de desempléu ente aquellos que tienen dalgún tipu de formación suelen ser menores qu'ente los qu'escarecen d'estudios cimeros. Y, a la vista de les cifres recoyíes pol INE, los que cunten con estudios cimeros son tamién los que meyor tán aguantando los golpes de la pandemia del coronavirus. Por exemplu, señala l'estudiu qu'aquellos asturianos que completaron namás los sos estudios básicos (la ESO o'l bachilleratu) tienen una tasa de desempléu del 18,2%, un porcentaxe mui perriba de la media de la rexón. 

L'estudiu tamién dexa un datu interesante. La tasa de paru xubió, non con demasiada intensidá, pero sí de xeitu significativu ente aquellos que recibieren formación superior n'actividaes rellacionaes cola salú o los servicios sociales. Cerró 2020, l'añu de la pandemia, nel 10,82%, cuando l'añu anterior yera unes cuántes décimes menor (10,07). Ye más plasmante entá si se tien en cuenta qu'hubo otros oficios, como físicos y matemáticos, nos que la tasa de desempléu baxó de forma acusada. 

Les patronales de les tecnolóxiques d'Asturies (el Cluster TIC), el metal (Femetal) y la construcción (CAC-Asprocom) –les trés actividaes nes que les tases de paru son menores– yá glayaron al altu la lleva va unes selmanes porque aseguraben que, magar les elevaes tases de desempléu que rexistra la rexón, nun son quien a atopar profesionales formaos. Colo que munches de les sos ufiertes d'empléu quéden directamente ensin cubrir. Los trés reclamaron al Principáu ameyorar los planes de formación pa consiguir atraer nuevos emplegaos a los sos sectores.