Uviéu, Xixón, Avilés y Siero, los cuatro conceyos asturianos de más de 50.000 habitantes, van tener qu'establecer nos sos centros urbanos en 2023 zones de baxes emisiones nes que se va prohibir l'accesu, circulación y aparcamientu a los vehículos contaminantes. Pero amás, esa mesma midida tendrá d'establecese en Llangréu, Mieres y Castrillón si se superen determinaos niveles de polución. 

La comisión de Transición Ecolóxica del Congresu de los Diputaos dio lluz verde'l xueves 8 d'abril a la Llei de Cambéu Climáticu y Transición Enerxética. Al testu incluyéronse, antes d'unvialu al Senáu, delles enmiendes que modificaron dalgunos de los artículos. Ente ellos ta'l referíu a la obligación de que los conceyos de más de 50.000 habitantes adopten planes de movilidá urbana sostenible qu'introduzan midíes de mitigación d'emisiones qu'incluyan, ente otres midíes, l'establecimientu de zones de baxes emisiones non más tarde de 2023. A propuesta d'Esquerra Republicana, y col sofitu de PSOE y Xuníes Podemos, el Congresu alcordó que los conceyos de más 20.000 habitantes tamién tengan qu'establecer eses llendes a la circulación de vehículos si superen los valores llende de contaminantes regulaos nel Real Decretu de 28 de xineru de 2011 relativu a la meyora de la calidá del aire. Son unos valores llende que dacuando son actualizaos pol Gobiernu cola participación de les comunidaes autónomes coles mires de dir rebaxando pasu ente pasu la polución. 

Con esi cambéu del testu de la Llei de Cambéu Climáticu y Transición Enerxética van ser siete los conceyos asturianos afectaos pol establecimientu de zones de baxes emisiones. Uviéu, Xixón, Avilés y Siero, al tener más de 50.000 habitantes, van tener qu'establecer eses llimitaciones al tráficu de vehículos contaminantes que nel so día aprobó con discutiniu'l Conceyu de Madrid (el denomináu plan Madrid Centro), pero amás Llangréu, Mieres y Castrillón tamién tendrán d'afitar esos llindes si superen unos determinaos niveles de polución al tener más de 20.000 habitantes.

Otres midíes

Les barreres a los vehículos contaminantes tendrán de dir acompañaes de midíes pa facilitar los desplazamientos a cuerpu, en bicicleta o otros medios de tresporte asociaos con vezos de vida saludables. Amás van tener qu'establecese corredores verdes intraurbanos que conecten los espacios verdes de los cascos urbanos coles grandes árees verdes periurbanes. Los planes de movilidá urbana sostenible tendrán d'incluyir midíes pa la meyora y usu de la rede de tresporte públicu, incluyendo midíes d'integración multimodal; midíes pa la electrificación de la rede de tresporte públicu y l'usu d'otros combustibles ensin emisiones de gases d'efectu invernaderu, como'l biometanu; midíes pa fomentar l'usu de medios de tresporte eléctricos privaos, incluyendo puntos de recarga, y midíes d'impulsu de la movilidá eléctrica compartida.