Un analís de Florentino Felgueroso, investigador de la Fundación d'Estudios d'Economía Aplicada (Fedea)

Esta pandemia volvió a facer rescamplar tres de los problemes más dramáticos de la nuesa sociedá: la probeza, l'avieyamientu demográficu y l'empléu xuvenil. 

La tasa de paru de persones de 16 a 24 años volvió superar el 40%, más del doble de la media de la Unión Europea, y 6 puntos porcentuales más que'l segundu país con mayores problemes de paru xuvenil, Grecia. 

Desgraciadamente, nun son cifres rares. El nuesu mercáu de trabayu ye tan bulímicu qu'esti indicador algama valores asemeyaos con frecuencia, cada vez que se produz una crisis y, darréu, mientres unos cuantos años más. Na última crisis, algamó'l récord de 57% (64% n'Asturies) y entá precisamos trés años d'espansión pa qu'asitiara per debaxo del 40% (n'Asturies, 3 años y mediu), pero'l restu del tiempu sigue en valores bien altos: fai 12 años que supera'l 30%. 

El problema del empléu xuvenil ye un problema estructural, de mala solución, pero foise agravando y tien efectos perxudiciales na vida adulta. De primeres, hemos tener en cuenta qu'estes resultancies tan negatives llógrense con munchos menos mozos qu'en tiempos pasaos. N'Asturies, no que va de sieglu, perdimos cerca de la metá de la población nesti tramu d'edá. 

Pero, amás, tamién se foi produciendo un deterioru progresivu, quiciabes menos visible, de les condiciones d'entrada al mercáu de trabayu. Nun estudiu recién en collaboración con Samuel Bentolila (Cemfi), Marcel Jansen (Universidá Autónoma de Madrid) y Juan Francisco Jimeno (Bancu d'España y Universidá d'Alcalá), amosemos que l'impactu negativu que tuvieron les últimes crisis nos salarios y nel tiempu de trabayu de los mozos fueron bultables, y que nun se recuperaron los valores previos nos periodos espansivos. Asina, los ingresos llaborales medianos de los mozos trabayadores son güei en términos reales ente un 27% y un 50% inferiores a lo que percibíen a finales de los años 80. Y los díes de trabayu (equivalentes a tiempu completu) cayeron ente un 22% y un 73%. Dambos fenómenos pueden esplicase pola cayida de la duración de les relaciones llaborales y pol amenorgamientu de la xornada llaboral. N'especial, esta última década caracterizóse por una medría de siguío de los contratos de mui curtia duración. El subempléu tamién creció considerablemente mientres la última crisis y aguantó ensin baxar dende entós, y estos fenómenos perxudicaron, sobremanera, a los mozos. 

¿Qué podríamos facer pa solliviar los problemes d'empléu xuvenil y facilitar la transición de la escuela al mercáu de trabayu? 

Munches coses, pero voi centrame equí solo nuna: observar y, na midida de lo posible, intentar remedar lo que faen aquellos países que lo faen meyor. 

Una tasa de paru xuvenil del 40% significa que cuatro de cada diez rapazos que quieren trabayar nun atopen un empléu. Esti indicador nun ye tan informativu pa realizar comparances nel tiempu y ente territorios como'l porcentaxe de mozos que trabayen y, entá ye más, el de los qu'estudien y trabayen. Aquellos países con menores tases de paru xuvenil nun son países nos que la mayoría de los mozos solo trabayen o solo estudien, sinón que combinen o compaxinen los estudios col trabayu. Primero los mozos tienen que deseyar y poder trabayar, entá estudiando, y, claro, deseyar y poder estudiar entá trabayando. N'España pasemos per un llargu periodu d'abandonu escolar tempranu, nel que los mozos, sobremanera los varones, dexaron la escuela atraíos pola llamada de sector de la construcción mientres la burbuya inmobiliaria. Esti periodu acabóse, y les nueves cohortes camudaron el trabayu polos estudios, non por una situación na que comparten dambes actividaes. Lo contrario de lo qu'asocede naquellos países con bastantes menos problemes d'empléu xuvenil. 

Estos siguen dos tipos de modelos: programes mistos de formación y empléu, la llamada Formación Profesional dual, bien presente nos países xermánicos, o compaxinar la xornada llaboral cola escolar, típica de los países anglosaxonos y de los países del norte d'Europa. En dambos casos, los mozos contabilícense como emplegaos, y esiste evidencia de qu'estos modelos faciliten la transición del sistema educativu a la incorporación definitiva al mercáu de trabayu. 

La nuesa esperiencia en Formación Profesional dual sigue siendo bien probe. L'actual modelu, empecipiáu nel añu 2012, nun cuayó: nun camudó prácticamente la proporción de mozos que combinen los estudios de Formación Profesional col trabayu. El modelu actual tien munchos defectos, posiblemente una falta de recursos, pero, sobremanera, una falta d'incentivos y polo tanto implicación pa solucionales. Apura entós facer una reforma del modelu pol bien del desenvolvimientu de la Formación Profesional (y del empléu xuvenil). 

Pero n'otros países, ensin un pesu tan relevante de la formación dual, tamién reparamos en que los mozos compaxinen estudios y trabayu. El paradigma quiciabes sía Holanda. Nesti país, el 41% de los menores de 25 años estudien y trabayen (el 8% n'España). Y otru datu relevante: cerca de la metá del empléu total del sector de la hostelería d'esti país ocúpenlu persones de menos de 25 años (12% n'España), y nel sector del comerciu alredor del 30% ye empléu nuevu (7%, equí). 

Al marxe de posibles esplicaciones culturales (la protección familiar) o económiques (los precios y les polítiques de vivienda y otres ayudes a mozos) rellacionaes con una mayor propensión a emancipase n'edá temprana nos países del Norte, los mozos pueden combinar estudios y trabayu cuando tienen unos puestos de trabayu "reservaos” pa ellos en determinaos sectores y ocupaciones. Por casu, xornaes que nun dean pa dos turnos a tiempu completu podríen completase por mozos, una vegada rematada la xornada escolar, como faen nes grandes superficies de dellos países. P'portar a dambes ocupaciones, los estudios y empléu, tamién se rique d'una mayor flexibilidá de la xornada y otres facilidaes nos centros de trabayu y d'estudiu, y que nun se discriminen a los que combinen dambes actividaes, ello ye, una “mentalización” de la importancia de que los mozos tengan accesu a dambes actividaes. 

Evidentemente, tienen que se producir abondo más cambeos pa iguar los nuesos problemes d'empléu de los nuesos mozos una vegada que rematen los estudios, tantu nel sistema educativu como nel mercáu de trabayu, y, especialmente, nel nuesu modelu granible. Estes acciones daríen pa dellos artículos más, pero creo qu'estos primeros cambeos ayudaríen abondo a la transición definitiva al mercáu llaboral.