Dos colleches de faba d'abril a ochobre y el restu de meses, con berces. Asina ye la producción combinada que tienen Miguel Rodríguez y Montse García en Villavaler, en Pravia, de la que salió la meyor faba asturiana d'Indicación Xeográfica Protexía (IGP) de la collecha 2020-2021. Un premiu que recibieron esti día na Primer Flor de Grau tres una cata a ciegues y depués de tan solo trés años cultivando la llegume reina de la comunidá

Y el secretu de les sos fabes, dicen, ye la bona grana que-yos dio la prima d'él, Mari Nieves Rodríguez, tamién de la localidá praviana, afamada poles bones colleches de faba dende antaño. N'esi sen, apunten a un microclima especial, pos el pueblu ta protexíu pel norte “y la borrina nun entra nin equí nin n'Inclán”, detallen. Asina ye cómo consiguen unes fabes de calidá “bárbaro”, tal que destacó'l xuráu del certame, una bona crítica que yá abarruntaben polos comentarios positivos de los veceros. 

Tou entamó va trés años. Montse García, animada por Rodríguez, dexó'l so trabayu na hostelería pa trabayar les tierres de Villavaler: “Los empiezos fueron caóticos. Llabramos y semamos 7.000 metros cuadraos y nacieron 34 plantes, entós garréles y lleveles pa otra tierra y volvimos semar. A la segunda vegada yá salieron toes”. A la fin, consiguieron una collecha bien bona que vendieron a particulares y, por pidimientu d'un veceru, empezaron a llantar berces. 

Primero empezaron en San Román de Candamu, onde viven, pero les berces terminaron llexando na riada del Nalón de xineru de 2019 “y acabaron toes en L'Arena, en Sotu'l Barcu”, bromia García, natural de Samartín de Lluiña (Cuideiru). D'esa forma empezaron el cultivu combináu en Villavaler, ensin problemes d'aveníes, y onde hortoliza y llegume crecen en tiempos alternos. Y dándose beneficios: “La berza, por casu, demanda nitróxenu enforma que ye lo que la faba-y apurre a la tierra”, detalla. 

Asina son quien a tener producción tou l'añu y, amás, ameyorando y con nuevos proyectos. Faen dos colleches de faba al añu. La primera va d'abril a xunetu, n'invernaderu, que se viende en frescu o en verde, como se conoz popularmente. Y de xunetu a ochobre, en finques al aire, tienen otra recueya. “Tolo que producimos tenémoslo vendío a una cadena d'alimentación pero'l problema ye l'accesu a la tierra, queremos ampliar pero ye bien difícil atopar finques. Fai falta que funcione'l Bancu de Tierres”, señala Rodríguez, con familia natural de Villavaler. 

Y como quieren siguir entamando y facelo en pueblu, tamién tienen seiscientos castaños de frutu nunos terrenales de los que disponía la familia que nun son curiosos pa la llabranza. “A los diez años dan la primer producción y ye un productu que tienes la collecha vendida y a 70 euros el quilu”, apunta. Les castañales que traxo de Galicia, onde la producción frutícola de castañes ye un sector n'alza, tán creciendo perbién y sanos. Anque observen diferencies ente los qu'hai en Villavaler y los que tienen en Corollos (Cuideiru) a cuenta del microclima: “Los d'equí son altos y tupíos y los d'ellí más pequenos y redondos”. 

Con too y con ello, esperen que nunos años se convierta n'otra de les sos producciones complementaries a la faba asturiana. Ello ye que Rodríguez yá se punxo, inclusive, a facer marrón glacé y nun refuga aumentar el terrén plantáu. “Ye una pena, das una vuelta y nun garres nin un kilu castañes, son tou ocalitos”, llamenta. Y nun refuga añedir otru rendimientu al terrén destináu a les castañales con cabres. “Niégome, depués vengo yo y toi equí con elles, doi-yos pan, y yá nun podría nin comelos”, repostia ella. 

La producción combinada d'hortolices d'iviernu cola faba asturiana como cultivu principal ye una de les llínees qu'encamienta'l Conseyu Regulador de la IGP. Una apuesta por rotar los terrenes y profesionalizar el sector pa que la faba dexe de ser una renta complementaria y s'imponga como'l nichu principal de negociu. Y la producción de Rodríguez y García en Villavaler da cuenta d'ello. 

Pero non tou foi fácil, reconocen. Pesie a la bona crecedera que tuvieron nestos trés años, l'aprendizaxe foi a fuerza d'ensayu y erru, aseguren. Pero'l so enfotu por sacalo adelantre fixo que se llevanten énte toles torgues que se presentaron. Si'l vientu tira embaxo los invernaderos, llevántenlos nun día y refuércenlos con malles qu'eviten una nueva cayida. “La idea que tenemos ye dir probando cada añu daqué nuevo y dir aprendiendo, queremos qu'el nuesu desenvolvimientu sía al traviés de la tierra”, afirma García. 

Y daqué qu'aprendieron el primer añu ye que la maquinaria fai falta pa trabayar con más comodidá y tiempu. “Lo que facíemos en trés díes agora fcémoslo n'unu”, destaquen. La mayor parte de la inversión tiénela fecho en ferramientes y semadores o fumigadores amañoses pal cultivu de la faba. Una producción a la que tienen pensao dedicase profesionalmente hasta la so xubilación col porgüeyu de siguir cultivando una faba asturiana de la máxima calidá.