Utilizando l'escuru cielu madrilanu como llenzu, Frodo Álvarez (Uviéu, 1977) propúnxose va unos díes pintar con drones de lluz a un futbolista xigante a puntu de cutir el balón. L'artista asturianu apostó fuerte y marcó gol: consiguió una imaxe que paez imposible de captar con una cámara fotográfica, ensin ayuda del retoque dixital. Pero Álvarez fai posible lo imposible. Ye un referente mundial del “light painting”: realiza fotografíes artístiques utilizando llargues esposiciones énte focos de lluz pa llograr sorprendentes efectos. Lo novedoso del so últimu proyectu ye qu'esa lluz que pinta nel aire sal de los drones. En concretu, de cinco drones.
“El dibuxu llográmoslu en cuatro o cinco minutos. Pero detrás d'ello hai un trabayu previu de facer el diseñu, nesti casu un futbolista, y depués pasalo al llinguaxe de los drones pa que sepan cuándo se tienen qu'encender y apagar, de qué color pintar, qué movimientu siguir...”, esplica l'artista uvieín. Nun ye la primer vegada que trabaya con drones –por casu, en 2019 realizó una fotografia nun circuitu de Valencia por cuenta de la Iberian Drone League–, pero nunca lo fixo a esti nivel. “Va un mes recibí de l'axencia Creartys una propuesta pa un campeonatu de fútbol d'Oriente Mediu. Y pensamos en facer daqué a lo burro con drones”, detalla. Ehí ye onde entró en xuegu l'equipu Umiles Drone Light Show, especializáu en facer coreografíes con hasta 70 drones. Pal proyectu de Frodo namás ficieron falta cinco.
Fíxose too nun aeródromu de Madrid, en cayendo la nueche, yá que pa desenvolver “light painting” fai falta la escuridá. “Teníemos cuatro intentos, porque ente'l toque de queda y la batería de los drones nun había tiempu pa más. Sabíemos qu'había qu'afinar tou lo posible dende la primer semeya. Y magar fuimos un poco a palpu, atinamos perbién”, comenta. Ello ye que la imaxe finalmente escoyida foi esa primera. Nella vese la figura d'un futbolista d'unos cuarenta metros d'altu trazáu nel cielu con colores coloraos, azules y moraos, y a piques de cutir un balón.
Pa realizar esa espectacular fotografía, esplica l'artista uvieín, “tuvimos qu'alzar nel cielu los drones y nel momentu qu'encendíen la so lluz, el sensor de mio cámara diba captándolos”. Amás, “asitiamos dos llinternes peñeraes a verdes p'allumar el suelu y asemeyar el verde del campu”. Quiciabes lo más difícil foi consiguir l'efectu del balón. “Ye una lluz con una cuerda nel estremu que cuando la xires alredor de la moñeca y lo faes con procuru xeneres una bola de lluz. Si lo faes más cera de la cámara sal más grande y si lo faes más llueñe, más pequena. Hai qu'atopa-y el puntu”, detalla. Na imaxe escoyida esa esfera “nun sal del tou correcha”, según opina Frodo Álvarez, pero'l conxuntu de la composición “tresmite muncho”. Principalmente, porque'l cielu nun sal tan escurecíu como nes fotografíes que se tomaron darréu, lo que dexa apreciar meyor les dimensiones del futbolista. Na so realización tamién participó Mario Lechuga, otru “light-painter” qu'acompaña davezu al asturianu.
¿Y agora qué? Frodo Álvarez asegura que los drones abriéron-y los güeyos “pa crear muncho más inda”. Y yá tien otra esperiencia preparada pal mes qu'entra. “Va quedar meyor entá”, afirma. L'uvieín, que tien la so propia empresa, llamada Children of Darklihgt, ta nun momentu de “reinvención” tres la pandemia. “El mio trabayu taba enfocáu a eventos, asina que llevé un golpe duru”, confiesa.
Col covid pensó, entós, en nuevos planes y salió la idea de facer directos de “light painting” al traviés de Youtube. “La xente recibiólo perbién y agora toi apostando fuerte por ello”, amiesta. Tamién apuesta fuerte por impartir cursos sobre “light painting” al traviés d'una academia de Barcelona, y por desenvolver, pa la so posterior vienta, una ferramienta (“Scanner Dkl Pro” lu llama) que dexa allumar modelos nes fotografíes y crear efectos como los que se ven na imaxe qu'acompaña esti reportaxe. “Toi faciéndolu con Edu Cajigal, de Xixón. Tengo muncha ilusión puesta n'ello”, conclúi.
