El “Avril”, l'AVE “puru” de Renfe que va ser quien a llegar a Uviéu y a Xixón pel actual trazáu ferroviariu del centru de la rexón, gracies a una tecnoloxía d'anchu variable como la que dexa al Alvia d'Asturies a Madrid circular indistinto per víes d'anchu ibéricu (convencional) o internacional (la específica de l'Alta Velocidá), yá ta en periodu de pruebes en dellos tramos de Zamora, Palencia o Álava. Como s'esperaba, el modelu ta demostrando capacidá pa circular a 330 kilómetros per hora (y más) en tendíos d'AVE, lo que supón unos cien kilómetros percima de la velocidá punta qu'algama agora pela Meseta l'Alvia que conecta la rexón cola estación madrilana de Chamartín. 

 La decisión sobre si esti tipu de trenes va operar ente Xixón y Madrid nun depende del Adif, sinón de Renfe. La compañía aseguró cuando fixo l'encargu que la d'Asturies yera una de les llínees pa les que taba previstu'l “Avril”. Sicasí, entá nun ta definíu'l destín de les primeres unidaes contrataes con Talgo. En total, van ser trenta. La metá con anchu variable. Si nun hai retrasos, los “Avril” van entrar en serviciu a finales d'esti añu. 

Nel casu de qu'Asturies consiga los “Avril” pa la so conexón con Madrid, y tomando como base'l trayectu ente la capital d'España y Xixón, el serviciu ferroviariu fadríase a una velocidá comercial de 330 kilómetros pel tendíu específicu d'AVE hasta Llión, un trazáu pel que los Alvia nun superen agora los 250 kilómetros per hora. A partir de Llión, y mentantu nun tea llistu'l “triple filo” hasta La Robla nin la variante de Payares, los “Avril” van adaptase al anchu ibéricu pa llegar a Uviéu y a Xixón pel trazáu actual y a una velocidá asemeyada a la del Alvia. 

Una y bona que s'afaye a l'Alta Velocidá tol tramu de Llión a La Pola L.lena, incluyíos los túneles sol Cordal, los “Avril” van circular per vía d'AVE hasta la capital l.leniza y a más velocidá de lo que lo faen agora los Alvia. Sicasí, tampoco van algamar de manera constante los 330 kilómetros per hora de la Meseta, por cuenta de la implantación del triple filo y de los trazaos soterraños. 

Amás de pola so rapidez y polivalencia, los “Avril” tamién destaquen por una gran capacidá. Frente a les 299 butaques del Alvia, el nuevu tren ta diseñáu pa 521 places, de les que 416 son de clase turista y 105 de preferente. La distribución de los asientos va ser con files de dos y trés butaques nos vagones de clase turista, y de dos namás nos de preferente. Un aspeutu importante ye que tolos asientos son orientables al sen de la marcha, con cuenta d'evitar incomodidaes como les derivaes del “fondu de sacu” de la estación de la capital de la provincia vecina. Amás, toles butaques disponen d'una pantalla de LED. El “Avril” tamién va ufiertar segmentar los coches asitiando paneles. 

En materia d'equipaxes, va disponer d'una capacidá d'hasta 206 llitros per plaza y tolos asientos van tener espaciu p'asitiar maletes embaxo, daqué que nun dexa'l Alvia.