Pareya cerca de los trenta busca vivienda nes Cuenques. Esencial: nueva o de construcción recién, con vistes a un parque. ¿Xera senciella? 

Non tanto. El xeógrafu y exalcalde de Llangréu, Aladino Fernández, asegura qu'ún de los problemes de la perda de población nes contornes del Nalón y el Caudal ye la falta de vivienda. Matiza que “hai munchos inmuebles vacíos”, pero que nun son viviendes calidables. Tamién apunta a que se construyeron demasiaos polígonos, con una visión “casi decimonónica”. Los datos conozse que-y dan la razón. Nel postreru cuartu de sieglu, perdiéronse 7.000 empleos nes Cuenques, teniendo en cuenta que nos 90 había 20.000 mineros y agora, menos de 700. La cayida demográfica ye muncho más sangrina que la llaboral: 65.000 vecinos menos que va 25 años. Dende'l puntu de vista sociolóxicu, sicasí, los espertos consultaos por esti diariu amartiellen en que ye la falta d'oportunidaes –o la perspectiva de falta d'oportunidaes– la principal causa pa esta sangría poblacional. 

Tornando a la pareya que busca casa: ye casi imposible qu'atopen n'ufierta una vivienda de nueva construcción. 

Aladino Fernández recuerda que, les últimes promociones de valumbu, fueron les de Nuevu Llangréu y Vascu-Mayacina. “La primera resultó esitosa porque llegó a tiempu”, destacó'l xeógrafu. Primero que la burbuya inmobiliaria españara, dexando a los asturianos col agua al pescuezu. Datos que confirmen les sos palabres: el conceyu de Llangréu medró la so población en 2009, daqué que nun asocedía dende 1965. Foi una xubida casi anecdótica, de 95 vecinos, pero tou un oasis nel ermu de la sangría demográfica que sufre les Cuenques. Yá entós, el Conceyu apuntó esti balance a “la meyora ambiental y de les infraestructures” y al impulsu a delles zones residenciales, como Llangréu Centro

La pareya que busca pisu nes Cuenques nun puede atopar una vivienda en Llangréu Centro, tán toes yá ocupaes. Asina que van probar suerte na promoción Vascu- Mayacina. 

“El casu de La Mayacina ye distintu. Nun s'ufiertó a tiempu, la crisis inmobiliaria azotaba yá a Asturies cuando la promoción terminó. Poro, munchos d'esos pisos quedaron vacíos”. Y asina siguen, asina que “en munchos casos empiecen a presentar daños por tar deshabitaes”. 

Árees industriales

Asina qu'esos pisos tampoco-yos valen. Decide, la pareya de trentenos, flexibilizar la busca: yá val una vivienda antigua, siempres que tea en bon estáu, pero la redolada ye irrenunciable. 

Y equí otru de los problemes a los qu'apunta Aladino Fernández: “El polígonu rique distancia de la población. Naide quier vivir al llau d'una fábrica, y la zona de les cuenques mineres nun se caracterizó por tener especial curiáu con esto”. “Camentóse en daqué casi decimonónicu; que teniendo puestos de trabayu, la xente diba permanecer nel llugar. Eso sirvía nel sieglu XIX, porque nun había medios de tresporte”, esplica Fernández. Y añede, atayante: “Lo que se busca ye una redolada prestosa, na que nun casa'l polígonu industrial”. 

Nin casa'l polígonu, nin casa la ruina. Y nes Cuenques, afirma l'espertu, “hai munches”. “Ye una realidá que la ruina axoriza, más la ruina industrial”. Tamién recalca que nos inmuebles ruinosos qu'hai en centru y barrios de les principales localidaes de les Cueques. Sirvan dos exemplos: el centru de Sama y el barriu de Requexu en Mieres

Misión imposible. Enfastiaos de la falta d'ufierta nes Cuenques, la pareya de trentenos decide ampliar la busca y consultar con inmobiliaries d'Uviéu y Xixón. 

“La única forma que tenemos de competir coles grandes ciudaes, Uviéu y Xixón principalmente, ye construyir un mediu ambiente que sía curiosu. Esa ye la xera por cumplir”, esplica Fernández. Y equí matiza: “acusóseme d'apostar poles ciudaes dormitoriu, pero nun ye asina. Falamos d'una redolada prestosa, falamos d'una ciudá pa vivir. Con tolos servicios, especialmente los del sector terciariu”. 

Dende'l puntu de vista d'Aladino Fernández, anque esa pareya que busca pisu trabayara nes Cuenques sería mui posible que marchara a vivir a otra zona d'Asturies. O non. Holm-Detlev Köhler, catedráticu de Socioloxía de la Universidá d'Uviéu y autor de dellos estudios sociolóxicos nes Cuenques, asegura que la vivienda ye “bien importante”. Pero lo principal, sostién dende siempre, ye “l'empléu” sobremanera “les oportunidaes qu'ufierta un territoriu”. Nel organismu AsturLab trabayen tamién dende otros prismes: la ufierta de servicios na zona rural y los servicios de conciliación pa que les families decidan quedase. 

Hai una verdá incontestable. Y dizla Aladino Fernández nun momentu de la so conversación con LA NUEVA ESPAÑA: “Lo principal pa caltener un espaciu urbanu ye tener residentes. Si escorres a los residentes, vamos poder tener polígonos industriales maraviyosos, pero dexa d'haber ciudá”. Hai solución posible, un poco d'optimismu, pero nun ye xera senciella: “Ye necesario un estudiu de mercáu en fondura, anque enfrentámonos a la realidá de que cada vegada hai menos xente nuevo. N'Asturies polo xeneral, y nes Cuenques de manera más clara”. Oxetivu: que los pocos que queden, apuesten por quedar.