“Versovera” convirtióse col pasu de los años nuna cita clave de la poesía asturiana y tamién de la mesma de la Selmana de les Lletres asturianes. La edición entama esti miércoles 5 a les 18.00 hores n'El Llar de Les Vegues. Como marca'l protocolu covid, l'asistencia hai que la solicitar primeramente. “La edición d'esti añu pretende dar espaciu a autores de la contorna, calteniendo al tiempu les señes d'identidá de Versovera”, destacó'l conceyal de Cultura, Jorge Suárez qu'avanzó amás que la programación cultural de mayu va tar venceyada a la Selmana de les Lletres con un ciclu del Cinefórum con proyecciones d'obres asturianes. “Tamién vamos acoyer actividaes singulares como'l ‘Dazibao’ que va ser el día 6 y va tar dedicáu a Nel Amaro y va cuntar cola participación de los más destacaos autores contemporaneos de la lliteratura asturiana”, añedió Suárez. 

Versovera va cuntar con Esther García López, Susana Sela, Xurde Fernández, Aurelio González Ovies, Esperanza Medina, Héctor Pérez Iglesias y el poeta corveranu Berto García, qu'acaba publicar “Origami”. Amás del recital poéticu, el “Versovera” va cuntar esti añu col conciertu del dúo “Lafu y Robeca”

El “Dazibao” va ser al otru día en Les Vegues. Ellí, una ventena d'autores asturianos van afigurar en cartelos de papel d'estraza los sos poemes, haikus o poesíes visuales. L'acción va desenvolvese ente la plaza Europa, l'auditoriu al aire llibre y el Paséu de la Vuelta Ciclista. Una vegada iguaos los “dazibaos” van ser espuestos en trés edificios de Les Vegues: Centru Sociocultural, Tomás y Valiente y Teatru El Llar. Los “dazibaos” van caltenese espuestos hasta les 13,00 hores del 7 de mayu. L'actividá va ser grabada pa darréu ser emitida na canal de YouTube “Territoriu Corvera”. 

El cinefórum n'El Llar va proxectar trés curtios “Dazibaos en Llangréu”, “Una islla al sur del polu norte, Guor” y “La vida de les piedres” el xueves día 6 a les 19.00 hores. Tamién va haber cine en La Lechera de Cancienes.