Los conflictos ente'l ser humanu y el llobu asoceden dende l'alba de los tiempos y nun conocen fronteres. Dellos zoólogos sostienen que bona parte d'esi enfrentamientu secular se debe a que son dos superdepredadores que compiten en munches ocasiones pol mesmu territoriu y bien asemeyaos no que se refier a comportamientos, adaptabilidá a cualesquiera redolada, estructures sociales xerárquiques, actitúes énte los adversarios y los potenciales peligros... 

El Senáu d'Idaho, n'Estaos Xuníos, aprobó un proyectu de llei que va permitir al Estáu contratar cazadores pa matar a tiros al 90 por cientu de la población de la especie, pasando de los 1.556 exemplares actuales, según l'últimu recuentu, a 150, mínimu llegal permitíu. La propuesta entá tien de superar dellos trámites, ente ellos, ser sancionada pol gobernador del Estáu, el republicanu Brad Little, y previsiblemente va acabar aldericándose nos tribunales de xusticia, vista la oposición de los grupos conservacionistes. 

La midida, que se xustificó polos daños a la ganadería y el descensu de les poblaciones cinexétiques, cuantimás alces y venaos, afogueró un alderique bien calcáu nel país. ¿Sería posible aplicar una midida asina n'España? ¿Sería deseable? Ganaderos y ecoloxistes opinen sobre la situación de la especie y el so futuru.

“Si se quier caltener la ganadería, daqué hai que facer col llobu, yá”

José Antonio García - Rexidor de pastos de Cuadonga

José Antonio García Álvarez, rexidor de pastos de la Montaña de Cuadonga, rescampla una “diferencia importante” ente Estaos Xuníos y España en relación col llobu: “Ellí saben cuántos llobos hai, disponen de censos bien fechos; equí, non”, llamenta. 

Sorraya que los daños que ta causando'l llobu n'Asturies obliguen a “facer daqué, yá”, pero nun sabe si sería conveniente “una peñerada tan sangrino”. “Si hai 500 llobos y se maten 400, nun pasa nada; pero si hai 50 y se maten 40, pones en peligru la continuidá de la especie”, indica

García Álvarez revela que los daños por ataques de llobos rexistraos en 2020 nel parque nacional de los Picos d'Europa fueron “soportables”, pero esti añu multiplicáronse. “Hubo matances al pie de los pueblos, daqué bien raro, asina que, si lo que se quier ye caltener la ganadería estensiva, daqué hai que facer”. Reconoz, eso sí, que ye un asuntu “tremendamente enguedeyáu”, “de mala solución” y que, al so xuiciu, “cada vez va a peor”. 

El rexidor de pastos apunta que la propuesta de permunchos espertos d'utilizar mastinos pa protexer el ganáu nun sirve nos Picos d'Europa, onde esti pastia llibre y nun se guarda na corte. “Amás, solo en Cangues d'Onís hai 208 llicencies pa soltar ganáu nel parque nacional, lo que supondría cerca de 500 perros nunes camperes nes que tamién hai turistes, vecinos que s'averen a esfrutar de la naturaleza... Nun podemos acribillar la zona de mastinos”, añede. 

Anque esaniciar el 90 per cientu de los llobos “podría facese tamién n'España”, García Álvarez sella que nun se fadrá “nunca” porque hai “munchos intereses en contra. Nes ciudaes, muncha xente sigue pensando que'l llobu ye un animal que caltener, y nun se da cuenta de que ye l'enemigu de la cabaña”.

“N'Estaos Xuníos nun se maten llobos nos parques nacionales; n'España, sí”

Ignacio Martínez - Presidente d'Ascel

Ignacio Martínez, presidente de la Asociación para la Conservación y Estudio del Lobo Ibérico (Ascel), destaca que dende 1973 funcionó n'Estaos Xuníos l'Axencia de Protección Ambiental, que salvaguardaba les poblaciones silvestres y la biodiversidá, y que foi casi desmantelada l'añu pasáu pol anterior presidente, Donald Trump

Martínez apunta que la decisión del Senáu d'Idaho topeta frontalmente coles polítiques de reintroducción activa del llobu que s'apliquen en dellos llugares d'Estaos Xuníos. Destaca, coles mesmes, una notable diferencia ente aquel país y España: “Ellí los llobos nun se maten nos parques nacionales; equí, sí”. Otra diferencia ye, según Martínez, “que n'Estaos Xuníos nun hai ‘garbanzos negros’ ente los científicos, asina que toos tán en contra d'esta matanza”

El presidente d'Ascel defende que nun tien “nengún sentíu nin fundamentu” estazar la xestión d'una especie, nin n'Estaos Xuníos, nin, como asocedió hasta agora col llobu, n'España. Entá ye más: sella que la decisión d'Idaho nun va tener “nenguna resultancia”, porque nos estaos vecinos y en Canadá acubíciase al llobu, asina que van siguir aportando exemplares

Según Martínez, la midida que se pretende aplicar n'Idaho diba ser “imposible” ya “inconcebible” n'España, porque, “afortunadamente”, la directiva europea Hábitats prohíbelo. “N'Europa hai un marcu lexislativu más verde, que busca caltener y recuperar, y nun hai la cultura de les armes y la caza qu'esiste n'Estaos Xuníos, que llevó a cuasiesterminios d'especies animales y, inclusive, de los indios americanos”, señala.