Nin los 62 metros a los que la mengüen dellos escritos, nin los 80 hasta onde la espurren les previsiones más desaxeraes nin, tampoco, por ser precisos, los 70 metros a los que s'arredondia, na guía oficial del templu, el tamañu de la torre de la Catedral d'Uviéu. El techu d'Uviéu, casi empatáu cola torre de Teatinos y al que solo la visera del Calatrava s'atrever a saca-y dalgún metru de ventaya, mide esactamente 68 metros y 70 centímetros.
La cifra apúrrela una de les persones que más hores dedicó nos últimos años al templu, Jorge Hevia, coordinador de la última restauración y arquiteutu responsable del plan director del templu. Les midíes más precises, esplica, son les que pueden llograse de la fotogrametría realizada va venti años, ortofotografía y planimetría desenvuelta per Media Digital que, con referencies topográfiques en dalgunos de los pisos dexa depués establecer una escala precisa y midir sobre'l papel.
Pero la primer dulda ye la de “hasta ónde midimos”. Sobre la flecha flamíxera de la Catedral d'Uviéu hai dos boles, siendo la segunda una esfera de la metá de volume que la primera. Sobre elles hai una cruz. Y sobre la cruz, un pararrayos.
Con esta referencia y la fotogrametría puede sabese que'l puntu más altu de la Catedral d'Uviéu marca na actualidá, 69,80 metros, alpenes 20 centímetros menos de los supuestos 70 metros. Pero'l pararrayos, por más que sía esencial y que les descargues eléctriques fueren unu de los grandes carecimientos de la torre, nun puede considerase un elementu propiu de la fábrica gótica. Esi ye'l motivu qu'obliga a amenorgar l'altor a los 68,70 metros que rexistra'l final del retruque metálicu de la Cruz de los Ánxeles que corona l'aguya. Ensin los agregos de cruz y globos de cobre, el chapitel concluyiría trés metros enantes, a los 65,80 metros. Y resulta curioso que, magar los elementos del remate s'incorporaron cola primer torre, la rematada en 1551, l'altor actual correspuende al recrecíu de Rodrigo Gil de Hontañón, qu'en 1587 dio por rematáu'l cuerpu renacentista actual sobre'l postreru mirador, decoráu colos elementos orixinales llegaos pa rematar el primer diseñu. Y Gil de Hontañón non solo plantega una configuración más moderna, estilizada y al gustu de la dómina, sinón que llevanta l'altor orixinal.
Les midiciones populares establecieron un rosariu de marques, dende los 62 metros hasta un máximu de 80 metros
El mesmu Hevia, Vidal de la Madrid, Cosme Cuenca, Jesús Puras y Luis Valdeón espliquen en “La restauración de la torre y el claustro de la Catedral de Oviedo” (Nobel, 2004) cómo Juan de Cerecedo “El Viejo” remató la obra de la torre según el proyectu de Juan de Badajoz “El Viejo”, arquiteutu de la catedral de Llión. Col chapitel concluyíu en 1551, en 1552 instalóse un remate metálicu con dos globos de cobre y una cruz que fuera encargada a un maestru flamencu, y que'l cabildru tuvo que dir recoyer al puertu de Laredo, procedente de Flandes.
Remataba asina “el primer episodiu constructivu na azarienta vida del campanariu uvieín”, esplica'l citáu estudiu. Lo qu'asocedió depués foi qu'una descarga eléctrica na terrorífica nube del 13 d'avientu de 1575, de la que da noticia'l canónigu Tirso d'Avilés, estrozó la torre.
Pa la restauración contratóse a Rodrigo Gil de Hontañón, y el so proyectu “supunxo una feliz alteración del aspeutu primitivu de la torre, yá que suponía l'agregu d'un cuerpu de remate ente l'últimu pisu y la flecha. Con ello llevantábase más l'altor total de la torre, cosa deseable naquellos momentos de puxu pola representatividá y presencia emblemática del monumentu, al tiempu que se la coronaba d'un preciosu cuerpu áticu de llínees mistes que sirvía d'aparente tránsitu ente la forma cuadrada de los cuerpos de la torre y l'octogonal de la flecha”.
Las torre primitiva de 1551 yera dellos metros más pequeña
Conque en 1587 la torre quedó nos 68,70 metros actuales, magar les destrucciones y reconstrucciones, que nun alteriaron la fisonomía d'Hontañón. A esi altor, cuando inda se facía, xubió delles vegaes el montañeru y fotógrafu Eduardo Velasco. Cuenta agora que la idea vieno del Conceyu, por recuperar aquella tradición de les banderes coloraes que depués de la Guerra Civil quedara desterrada. Velasco recuerda que naquellos años, los ochenta, primero de la restauración, aquello de riba “taba bien malo”. “El fierro taba tan comíu que teníes que xubir pola piedra con muncho curiáu”. Depués d'andar pol Himalaya y mediu mundu, los 68.70 metros nun yeren muncho pa Velasco, pero poner y quitar les banderes del xubiléu sí lu entretenía la xornada, coincidiendo col reloxeru naquelles altures. Tamién recuerda perfectamente dir cobrar el trabayu directamente al despachu del alcalde. Masip, rellata, preguntába cuántu se-y debía poles dos esguilaes, sacaba'l dineru del caxón y ellí mesmu-ylu abonaba. Otros tiempos, el mesmu altor.
