Peles estrenches y medievales cais del pueblu de Baselgas, en Grau, diba muncho tiempu que nun se vía corritiar a un neñu. Ello ye que casi nun pasaba naide: solo había dos vecinos asitiaos. Hasta que llegó Mael colos sos padres la pasada primavera y Baselgas empezó a alicar. Los padres del neñu que lleva'l futuru a Baselgas son los conocíos músicos de la escena folk asturiana Rubén Bada y Leticia González, que formen el grupu “L-R”. Treslladaron a esti pueblu'l taller d'instrumentos que teníen en Xixón y montaron un estudiu de grabación so la panera. Ellí tán rematando'l so próximu discu, “N.O.S.”, que sale en xunu.

La pareya montó un taller de construcción d'instrumentos

“Llevaba años queriendo venir, siempres nos gustó la vida rural y primero de dir a Xixón vivimos en Carreño y Siero, pero col confinamientu, col bichu, vinimos a Baselgas y vamos quedar, tenemos que dir empadronanos”, diz Leticia, que tien d'apellíu artísticu Baselgas, el pueblu d'orixe de los sos padres y antepasaos. Ellí tien la casa familiar, onde pasó llargos periodos vacacionales y fines de selmana. “Ye l'orixe de la mio familia, esta casa ye parte de la mio hestoria. Enxamás me voi desfacer d'ella”, afirma. 

Bada, violinista, guitarrista, intérprete de bouzouki, lutier y, a la fin, ún de los músicos de folk de mayor proyección internacional, crióse nun pueblu carreñense y, d'adolescente, marchó a Les Vegues (Corvera): “Ye daqué que nun superé nunca hasta que volví pal monte”. Esa idea compartida de desenvolvese profesional y vitalmente en pueblu llevólos a Baselgas, onde esperen que Mael tenga lluego vecinos colos que xugar gracies a la puxanza y ciertu repoblamientu que ta viviendo la zona rural de Grau dende'l confinamientu de 2020. “A ver si abre la escuela de Sama”, comenten con vistes al futuru escolar de Mael.

L'estudiu de grabación ta so la panera: ellí fixeron el so próximu discu

Una vida de sones distintos a los de la ciudá y d'un silenciu pacíficu que lo anubre too. Y eso ayuda enforma a Bada pa fabricar los instrumentos musicales na lutería qu'instaló so la panera. “Ye un búnker y sales y mires lo que tienes delantre, tomes un cafetín o das un paséu. Ye un ritmu distintu y la calidá de vida ye otra”, diz. Eso sí, ye importante fundise col pueblu, afirma, compartir charra colos vecinos. “Hai una tresmisión de conocencia de la que siempres deprendes daqué”, añede. 

Bada ye un lutier nun pueblu de tradición artesana, onde antaño había goxeiros, canteros o carpinteros, y dende el qu'agora salen instrumentos musicales pa tol mundu. Yá manó coses a Irlanda y Chile. “Enantes, tol mundu aprendía a facer coles manes; esa xente llevantó y caltuvo'l pueblu mientres muncho tiempu, hasta que s'afitó la idea de qu'esto nun yera'l progresu”, apunta Leticia Baselgas. 

Nesta casa de Baselgas, la música siempres trescaló les parés. Muyeres de sones y cantares y llar de músicos, onde entá caltienen una flauta de principios del sieglu XX. Lamentablemente, perdióse una bandurria qu'apaez nes semeyes familiares hasta los años cuarenta. “Ye un venceyu mui poéticu”, señala Baselgas sobre la relación ente la lutería y la hestoria musical de la casa, con vistes a la sierra de la Cuota, que nel so cordal atópase'l pueblu desiertu de La Condesa. Naturaleza total a venti minutos de la villa moscona.

El nuevu trabayu d'esti dúu que revoluciona la tradición titúlase “N.O.S.”

“L-R” formen un dúu revolucionariu nel folk asturianu: sones tradicionales combinaos con blues, rock o jazz con un gustu esquisitu. En Baselgas terminaron de grabar y dar forma al nuevu discu, más visceral que l'anterior. “Creamos permuncho nel confinamientu, teníemos esa necesidá, y el discu acabó garrando otra dimensión más introspectiva”. El próximu branu van llevalu al escenariu, al que tán xubíos estos díes nuna pequena xira pel Llevante. “N.O.S.” ta compuestu por una docena de temes pa salir a baillar al son de “L-R”. Y quiciabes, dalgún día, la pista sía na fiesta de Baselgas, a mediaos d'agostu, con Mael y más neños xugando pel pueblu.