Un grupu d'artistes fincaos en Piloña, encabezaos por Rodrigo Cuevas, adquirió l'antiguu edificiu de la sociedá La Benéfica con cuenta de convertilu nun centru cultural.
La Benéfica remonta a les primeres décades del sieglu XX, cuando se constituyó una sociedá de socorru mutuu rellacionada cola emigración. “Yera una suerte de seguru social vecinal”, esplica Cuevas. La sociedá tuvo tantos socios en Piloña que construyeron un edificiu en L'Infiestu. Funcionaba como see social, teatru y sala de fiestes.
Rodrigo Cuevas, Nacho Somovilla y Sergi Martí decidieron mercar esi edificiu. Cuando solicitaron nel Conceyu la información pa facer un cambéu d'usu dixéron-yos que tenía llicencia de teatru, daqué qu'ellos desconocíen. “De sópitu tábemos recuperando un teatru”, celebra Cuevas.
L'artista uvieín asitiáu en Piloña –y que, col so espectáculu “Trópico de Covadonga”, enllena tolos teatros d'España– quier devolver al pueblu, a l'aldega asturiana, tolo que-y dio. “Yo gano dineru colo que recueyo de los pueblos, cola tradición que ta nes aldegues, pero nun tengo forma llegal de devolver esi dineru al pueblu, asina que abultonos que nun había meyor forma de devolver tou eso que nos tienen dao que facer un teatru en L'Infiestu y crear un focu cultural potente nel entornu rural”.
Los trés amigos crearon una asociación y lo primero que van entamar ye'l proyectu “Escaparate”, que presenten güei en L'Infiestu. Trátase de “mapear tol texíu artístico qu'hai en Piloña, que ye muncho”. La idea ye que toos esos artistes apurran pieces que se van esponer nos escaparates de los comercios zarraos de la capital del conceyu de Piloña. Asina ellos van conocer a los compañeros artistes que viven nel conceyu y los ciudadanos van poder esfrutar d'eses creaciones. Ehí entra tou. Rodrigo Cuevas dexa claro que nun estrema ente arte y artesanía, de manera que pa él tien el mesmu valor “una paisana que decora teyes o un señor que fai maquetes, qu'un pintor o un escultor más profesional”.
Va ser un “escaparate” p'hacia l'esterior p'amosar tola actividá cultural del conceyu, pero tamién-yos va sirvir de llaboratoriu pa dir diseñando lo que va ser La Benéfica, un proyectu que va más allá del edificiu y que busca llevar la cultura al entornu rural, d'u sal tola producción de Cuevas.
El camín acaba d'empezar, pero, resucitada, La Benéfica ta llamada a convertise, con chigre incluyíu, nun centru de referencia artística y cultural; y, probablemente, non solo d'Asturies.
