La prestixosa revista Nature asoleyaba esti día na so portada'l descubrimientu del enterramientu humanu más antiguu d'África, nel que participó un equipu multidisciplinar d'espertos d'instituciones y universidaes de Kenia, Alemania, España, Francia, Australia, Canadá, Suráfrica, Reinu Uníu y Estaos Xuníos. Del llau español tuvo una intervención relevante la paleoantropóloga María Martinón, directora del Centru Nacional d'Investigación sobre la Evolución Humana, con see en Burgos, qu'en base a unos dientes, unos güesos y un craniu tuvo que enxarabillar la identidá de los restos humanos del singular afayu. Trátase d'un neñu de la especie homo sapiens d'unos trés años, soterráu fai 78.000 años a la entrada d'una cueva de Panga ya Saidi, en Kenia, na costa este del continente negru. Por encargu de Martinón, el pintor de naturaleza asturianu Fernando Fueyo recreó nun llenzu la imaxe del menor, al que la ciencia bautizó col llamatu de “Mtoto”, que significa “neñu” en suajili, interpretáu, en base a los datos apurríos polos descubridores del afayu. El dibuxu de Fueyo acompaña l'estudiu que publica Nature.
Fueyo visitara África va unos años con Juan Luis Arsuaga, ún de los referentes intelectuales de los afayos de Atapuerca. D'esi viaxe caltién un estensu arsenal de dibuxos que-y sirvieron pa recrear agora, na distancia, a Mtoto. “María llamóme per teléfonu y esplicóme cómo apaecieren los restos, que daben a entender un cuerpu humanu de pocu tiempu, recostáu sobre'l llau derechu, sobre una especie d'almada de yerbes y cubiertu por una pelleya d'animal a manera de sudariu”, esplica'l pintor asturianu, autor de la imaxe que dende esti día da la vuelta al mundu a recostines de la publicación científica. “Trátase d'una semeya bien humanizada, bien entrañable, como d'un neñu dormíu. Cuando María Martinón la recibió, nun aparaba de llorar”, añede Fueyo.
Dos dientes, visibles na superficie mientres la escavación, llevaron a los investigadores a abarruntar que los restos podríen ser humanos. El trabayu d'antropoloxía dental entamáu confirmó que los dientes pertenecíen a un neñu humanu d'ente dos y mediu y trés años.
Depués de dellos meses d'escrupulosa escavación fueron faciendo nuevos y espectaculares descubrimientos. “Empezamos a desatapar partes del craniu y la cara, cola articulación intacta del quexal y dellos dientes ensin raigañu qu'entá nun se formara”, esplica la paleoantropóloga María Martinón. “L'articulación del carrastiellu y les costielles tamién se caltenía, ya inclusive se caltenía la combadura de la caxa torácica. Tou esto apuntaba a que se trataba d'un enterramientu fechu adréi y que la descomposición del cuerpu asocediera nel mesmu cuévanu na que s'atoparen los güesos”.
L'analís microscópicu de los güesos y del suelu circundante confirmó que, en siendo posáu nel cuévanu, el cuerpu infantil fuera cubiertu con tierra rápido, pa protexelu de manera rudimentaria de la esgonciadura. Mtoto atopábase en posición flexionada, coles rodíes escontra'l pechu, recostáu sobre'l so llau derechu. Y asina lo dibuxó Fueyo.
