Dicen los científicos que si'l salmón nun fora un pexe y si alredor d'él nun se llevantara una industria turístico-deportiva, güei al rei de los ríos nun diben poder toca-y nin una escama n'Asturies. Alfredo Fernández Ojanguren y David Álvarez, biólogos de la Universidá d'Uviéu, sostienen que la especie tendría de tar yá vedada nes cuenques asturianes, porque'l pronósticu nun ye malu, sinón terrible. “Vamos quedar ensin salmones”, avisen. Y si sumen, yá nun hai vuelta pa tras. Sería la estinción del salmón cantábricu. Los afectaos, los pescadores, ven, sicasí, los ríos con otros güeyos: “Ye mentira que'l salmón tea en peligru y la veda nun ye la solución”. Dambos colectivos solo se ponen d'alcuerdu pa dicir que “el Principáu tien de facer muncho más pola especie”. 

¿Cuerre peligru d'esaniciar? Según los científicos, sí. Y ponen como exemplu les captures d'esta campaña: 36 en casi un mes. La pasada, qu'arrincó con retrasu (el 19 de mayu) pola pandemia, llegó a 856 salmones. Un númberu cimeru a les temporaes 2019, 2018 y 2017, pero inferior a les anteriores. Lo cierto ye que la gráfica de la evolución de captures tien munchos picos. “Hai años peores y hai años meyores”, diz Antón Caldevilla, presidente de la sociedá de pescadores “El Esmerillón” del Seya. Caldevilla espeta que “el científicu que censa pol númberu de captures nun ye un científicu”. “Cuando faigan un estudiu en ríos y mar, falamos”, amiesta. 

Enrique Berrocal, al mandu de la sociedá “Las Mestas del Narcea”, reconoz que la temporada d'esti añu ye “mediocre”, pero tamién recuerda que “acabamos d'entamar”. L'últimu día de pesca va ser el 15 de xunetu. Berrocal tira d'un asemeyanza futbolística: “Nun pueden xulgar lo fecho nun partíu viendo solo hasta'l minutu cinco, porque igual nel 99 se meten siete goles”. Sía que non, si se pesquen menos salmones, apunta Antón Caldevilla, ye “porque nun nos dexen pescalos”. Y menta les principales restricciones d'esti añu: nes zones llibres el cupu baxa a dos y prohiben la ninfa, un tipu de señuelu bien efectivu, mientres l'últimu mes (del 15 de xunu al 15 de xunetu). 

Una baxada xeneralizao. David Álvarez, profesor de Zooloxía de la Universidá d'Uviéu, esplica que'l declive del salmón afecta a tola so área de distribución, nun ye un problema únicu d'Asturies. “N'Estaos Xuníos ta prácticamente sumíu y nel norte d'Europa les poblaciones tán menguando”, apunta. Pero, amás d'esti enclín xeneral, los salmones del Principáu naden a rodapiellu, yá que tán na llende sur de distribución y eso significa que “la población ye más sensible”. “La temperatura de los ríos ta a la llende pa la especie”, repostia Alfredo Fernández Ojanguren, tamién profesor de la Universidá d'Uviéu. 

Los númberos son los que son y dende'l puntu de vista científicu, dicen, el salmón cantábricu tendría de tar catalogáu en peligru d'estinción a nivel local. “Si fora otra especie –señalen–, taríalo”. ¿Por qué nun lo ta? Los investigadores de la Facultá de Bioloxía respuenden rápido: “Porque hai intereses económicos detrás y porque'l salmón nun espierta esi ciñu que sí espierten otres especies –el claru exemplu del osu–. Nun tenemos la mesma empatía con un pexe que con un mamíferu”. 

¿Qué tán faciendo n'otres partes del mundu? Según Álvarez y Ojanguren, amenorgar captures, imponer la pesca ensin muerte o, directamente, vedar los ríos. Los dos científicos son partidarios d'aplicar esti últimu antídotu n'Asturies. Anque, espliquen, la pesca ensin muerte ye meyor que pescar salmones y comelos, nel casu del Principáu nun diba ser abondo, una y bona esta modalidá siempre va suponer un engorriu pa la especie. David Álvarez pon l'exemplu del urogallu cantábricu, una especie que ta en serio peligru de sumir. “A naide se-y escurriría dexar güei cazar urogallos nin poner perros p'asustalos”, comenta. Cierto ye qu'hai munchos menos urogallos que salmones: l'últimu censu fala de menos de 300 exemplares. 

 Volviendo a la pesca tradicional, Ojanguren cree que lo que se ta faciendo n'Asturies ye “cargase a los meyores exemplares, a los que sobreviven nos ríos, cruciaron el mar y volvieron pa reproducise”. Dende'l so puntu de vista, hai que ver les captures non solo como pexes muertos, sinón como salmones que pudieron reproducise y nun lo fixeron. Como datu, una fema pon “ente 5.000 y 6.000 güeves”. 

Enrique Berrocal y Antón Caldevilla anecien en que la solución nun ye vedar, porque eso supón l'abandonu de los ríos. “Nel Esva cuntáronse 110 salmones y solo se pescó ún l'añu pasáu. ¿Ye un problema la pesca? Non”, sorrayen. 

La caña nun ye l'únicu enemigu. Los mesmos científicos reconocen que na mala situación del salmón inflúin más factores. Anque, lóxicamente, prohibir les cañes ayudaría a que la especie remontara. Quiciabes sía tamién la solución más fácil. Los pescadores Antón Caldevilla y Enrique Berrocal falen d'unos enemigos de los que l'Alministración s'escaez: les mabees, les llubines, la mala traza de los ríos... “Pésquense llubines d'unu y dos quilos con dellos alevines de salmón nel so interior”, quéxase Berrocal. 

¿Por qué nun cuaya la pesca ensin muerte? Nun cuaya equí nin nel restu d'España. El presidente de la sociedá de pescadores Las Mestas del Narcea cree que'l motivu ye porque “nun s'impón”. Ello ye, habiendo pesca con muerte tamién, los riberanos opten por esta. Agora bien, esto nun quier dicir que los pescadores nun tean concenciaos. De fechu dicen, son los primeros interesaos en qu'haya salmones nos ríos. “Yo toi a favor de que nun se maten salmones, pero nun quiero imponé-ylo a la xente, miro de concenciar”, asegura Enrique Berrocal. Concenciar al traviés del so proyectu “Arca”, la iniciativa repobladora qu'ufierta a cualquier pescador la posibilidá de dexar los exemplares que pesque pa destinalos a la rexeneración de la cuenca. El plan funciona, con sueltes de 60.000 o 70.000 alevines. 

La repoblación, ¿sí o non? Equí vien otra de les principales peloteres ente científicos y pescadores. Los primeros dicen que non solo nun son efectives, sinón que son “nocives”, como señala David Álvarez. “En Gales tán prohibíes y hai dellos estudios nel mundu que dicen que los efectos son más malos que bonos: hai problemes xenéticos, de reconocencia de depredadores, tienen menos puestes...”. Los segundos, los riberanos, opinen xusto lo contrario. Y apurren númberos. “De 92 salmones qu'entraron l'añu pasáu en Valdunu, 42 nun teníen adiposa, ello ye, proveníen de la repoblación. Esa ye la pura realidá”, comenta Berrocal. “Les repoblaciones son efectives y toi convencíu de que si dexamos de facelo, nel Narcea –ye'l ríu que más captures rexistra en tola Cornisa Cantábrica– en diez años nun habría salmones”, añede.