Aquello que cantaba'l poeta de que “Volverán las oscuras golondrinas, en tu balcón sus nidos a colgar...” quiciabes nun tea aseguráu casi dos sieglos depués. Bécquer compunxo versos talos como una oda al amor perdíu y a la fatalidá. Precisamente esta postrera escuca dende va unos años y cada vez más a les andolines, con un destín más bien visiegu.

Una anolina procedente del Sahel qu'añeró n'Ardines (Ribeseya) NICOLÁS LÓPEZ-JIMÉNEZ

Porque cada vegada tornen menos exemplares a Asturies a mangar los sos niales cuando de los balcones, cuando nes tenaes, nos biztechos de los teyaos o nes trabes de les vieyes casones. “Quedamos ensin andolines”, resumen de forma atayante na organización SEO Birdlife, que calcula que cada añu n'España piérdense un millón d'exemplares d'un páxaru “símbolu de los nuesos campos”. Yá en 2014 la organización lu nomó “Ave del añu” pa sollertar sobre la so desapaición. 

A los pueblos asturianos –y en menor midida a les ciudaes– llegó tradicionalmente a mediaos de la primavera pa pasar el branu, un vezu que forma parte del so ciclu migratoriu: iviernos en busca del calor del Sur, del que fuxe al Norte al acabar la estación. Precisamente esti 9 de mayu celebróse'l Día mundial de les aves migratories.

“Qu'una andolina con 18 gramos de pesu, que llega procedente del Sahel, travesando'l Sahara y percorriendo 5.000 kilómetros, escueya la casa d'un humanu pa criar ye un privilexu y un regalu de la Naturaleza”, sostien Nicolás López-Jiménez, delegáu de SEO n'Asturies y responsable del programa de caltenimientu d'especies. 

Él foi'l privilexáu que tuvo como inquilín a exemplar talu na so casa d'Ardines (Ribeseya). Pero cada vegada son menos los asturianos que reciben la visita añal del ave. La sensación xeneralizada ye qu'alpenes se les ve yá esnalar pel cielu, añerando o folgando sobre dalgún tendíu eléctricu en grandes grupos, una imaxe que munchos guarden na retina de cuando yeren pequenos. Esa sensación acompáñase y constátase con datos. 

“L'andolina podría considerase n'España dientro de la categoría d'amenaza ‘vulnerable’, yá que sufrió un alarmante cayente poblacional del 33% nos postreros diez años y esiste una clara probabilidá d'estinción de cuandu menos el 10% dientro de los próximos cien”, recueye'l delegáu de SEO nun informe. Solo cuatro comunidaes autónomes (Asturies nun ta incluyida) tienenla como especie amenaciada: Baleares, Castiella-La Mancha, Andalucía y Estremadura. Nel restu d'Europa la situación ye inclusive peor que n'España. 

Causes

¿Por qué? Son múltiples los factores qu'amenorguen la población de l'andolina común y, polo xeneral, de toles especies amestaes al campu. El despoblamientu ye ún d'ellos, una y bona que l'abandonu y destrucción de los sos llugares de cría implica que nun tengan onde asitiar. Nes ciudaes, los edificios modernos nun son precisamente mui útiles pa l'andolina. Otru problema: l'usu intensivu d'insecticides y otros productos químicos, qu'afecten tanto a la so capacidá reproductiva como a los insectos de los que s'alimenten. 

Nicolás López-Jiménez propón caltener los sos niales, pos “son aves bien fieles a los sos territorios de reproducción”, tamién curiar los biztechos y requexos abellugaos onde los monten. Tamién plantega instalar niales artificiales o facilitar que tengan a mano material pa facelos (folla, paya). 

Son pequenos xestos de gran ayuda por que, parafrasiando al poeta, les andolines vuelvan a picar coles sos nales a los cristales de les nueses cases.