En trés décades encararon dos crisis mundiales que lo xiringaron tou, pero ellos siguieron tocando como si, asonsañando a la orquesta del “Titanic”, quixeren marcar el camín p'hacia la salida. La Orquesta Sinfónica del Principáu (OSPA) superó la crisis económica de 2008 y agora sigue sonando, con un peraltu nivel, según el públicu espertu, metanes la pandemia mundial del covid-19. El miércoles, 12 de mayu, cumpliéronse 30 años del primer conciertu de la OSPA. Aquel estrene asocedió nel teatru Campoamor d'Uviéu.
La orquesta sinfónica d'Asturies, que tien como presidente d'honor al rei Felipe VI, ta compuesta por sesenta y nueve profesores de dellos países de la Unión Europea (UE), Rusia, Estaos Xuníos y Llatinoamérica. A ellos aúntase un equipu técnicu y artísticu encabezadura pola so xerente, Ana Mateo, que brinda esti cumpleaños “al públicu qu'en momentos tan complicaos como los que tamos pasando sigui allegando a toos los nuesos conciertos”.
Colos sos 30 años, la OSPA adquirió maureza de conxuntu, daqué que nuna formación d'esti tipu lleva muncho tiempu consiguir. Mateo considera que yá tien “un soníu propiu” y esto débese “a la responsabilidá de caún de los componentes de la orquesta”. La xerente da una de les claves de la crecedera siguida de la formación. Pese al pasu de los años, los músicos “nun se dexaron llevar pola galbana, sinón que la orquesta trabaya día ente día pa siguir creciendo”.
La redolada, Asturies, y, cuantimás, Uviéu, onde la OSPA tien la so sede permanente, tamién inflúin. “Uviéu ye un oasis n'España. Pola tradición musical, porque tien un públicu mui melómanu y porque ye una ciudá que nun tien comparanza en presencia de la música clásica al respective de otres ciudaes del so tamañu”. Eso dexa a la orquesta asturiana “proponer coses más ventureres”.
Eses propuestes ventureres son tamién les que gusten a los músicos y nes que munches ocasiones surde, como esplica Ana Mateo, “lo que los flamencos llamen duende”. Son esos conciertos en que'l públicu queda apegáu a les butaques y eso solo tien una esplicación: “Los músicos tienen unes ganes constantes d'aprender y eso ye lo que fai a esta orquesta distinta a otres y lo que-y permitirá llegar hasta onde quiera”.
Marcos Fernández (violín) ye ún d'esos músicos y tamién ye unu de los que taba aquel 12 de mayu de 1981 nel teatru Campoamor con Doron Salomon como director y Dmitri Alexeev como solista. Fernández recuerda aquellos primeros ensayos, “bien lluego surdió la química”.
La química ente los músicos foi más allá del escenariu. Yeren mozos na ventena que depués de los ensayos marchaben de cañes. “Fueron grandes tiempos, pasámoslo perbién”.
Aquellos rapazos crecieron xuntos, con munches hores d'ensayu y muncha vida compartida. Na alcordanza colectiva de la orquesta ta aquella viaxe a China a finales de 2007. Ellí pasaron les navidaes y celebraron el nuesu añu nuevu. Fernández nun escaez aquel conciertu “nuna sala con condiciones climátiques un poco fresques y colos músicos llevantándose a coyer los sos abrigos en mediu del conciertu, lo que xeneró un poco de tensión ente'l públicu al rematar l'actuación”. “Recuerdo esos viaxes con muncho ciñu. Nun sabemos si volverán repitise”, llamenta'l violinista.
Pero non solo ellos crecieron xuntos. Coles mesmes el públicu asturianu diba adquiriendo adulces una meyor educación musical gracies a la OSPA. Polos sos conciertos n'Uviéu, Xixón y Avilés, pero tamién por una xera pedagóxica qu'arreya tanto a la xerencia como a los músicos y que llevó a la OSPA a permunches pequenes localidaes asturianes y tamién a llugares como la cárcel, residencies de mayores, colexos, centros de discapacitaos o distintos servicios del Hospital Universitariu Central d'Asturies (HUCA).
“La OSPA ye una orquesta pública y tien que llegar a toles partes”, afirma atayante Fernández. Amás, reconoz que pa él “ye una preste personal llevar la música a llugares nos que la xente nun puede aportar a ella”.
Magar que llegó unos años depués, l'avilesín Daniel Sánchez (clarinete baxu principal), desenvolvió tola so carrera profesional na OSPA. Llegó a la orquesta con 22 años en 1994 y sacantes trés años que tuvo de excedencia, siempres tuvo na orquesta asturiana. Pero Sánchez nun se llindó a tocar el clarinete, sinón qu'exerció de director y hasta de compositor, les sos dos grandes pasiones amás del clarinete.
Sánchez dirixiera les bandes municipales de Candás y Sama de Llangréu, asina qu'un añu depués d'integrase na sinfónica asturiana pidió-y al entós director titular, Max Valdés, que-y diera clases particulares de dirección. “Díxome qu'estudiara y eses coses, diome llargues, en definitiva”. Pero'l mozu Sánchez taba convencíu de que quería dirixir y años más tarde convenció al maestru Valdés. Llegaron eses clases particulares, que s'allargaron mientres dos años, y a elles axuntáronse munchos estudios y un máster n'Alemania. Confiesa que-y apasiona tener “a la orquesta nes manes”. Pero esi preste ye entá muncho mayor cuando la orquesta ye la mesma, de la que formes parte; entós conviértese “nuna esperiencia maraviyosa”. “Conozo perfectamente a los mios compañeros, sé cómo toca cada unu d'ellos y dirixilos ye impresionante, ye una de les meyores orquestes d'España”.
“Cuando estudiaba dirección dicíenme que dirixir la OSPA ye como conducir un Ferrari, y asina ye, faigas lo que faigas coles manes la orquesta va sonar bien”, asegura.
Pero la so esperiencia cola orquesta nun se queda ende. Daniel Sánchez vio y escuchó cómo los sos compañeros estrenaron dalgunes de les sos composiciones. “Ye como dar a lluz”. Nesti casu “tu tienes una partitura na cabeza ya imaxines cómo va sonar pero cuando la toca la OSPA ye un placer y un arguyu enorme”.
Ellos son solo parte d'un tou, d'un grupu de profesionales con una cualificación peralta que magar llevar trés décades tocando xuntos, en cada programa qu'interpreten afayen nuevos colores y nueves sonoridaes. La OSPA fíxose adulta y entra nuna etapa de brillantez que de xuru que va siguir dexando clavaos a los espectadores nes butaques.
Jantien Kassies y Gustavo Fernández Buey, el matrimoniu nacíu del amor pola música
Pa escoyer a los músicos de la OSPA fixéronse prebes en distintes ciudaes españoles, pero tamién en París y Amsterdam. Nesta última ciudá presentóse la violinista Jantien Kassies, y sacó la plaza, asina que se vieno a Uviéu. N'Uviéu taba yá'l vallisoletano Gustavo Fernández Buey. Llegara a la ciudá pa estudiar con Yuri Nasushkin, ún de los “virtuosos” de Moscú. Al poco llamáronlu pa facer una sustitución na OSPA y ellí nun atopó solo'l trabayu que buscaba sinón a la muyer de so vida.
“Yo taba tocando na orquesta y llegó un mozu bien simpáticu con camiseta de rayes”, recuerda ella. A él lo de tar n'Asturies facíase-y raro “porque pa mi golía a vacaciones, yo braniaba equí y nun lo vía como llugar de trabayu”. Agora la pareya lleva “braniando” xunta les trés últimes décades, y al par d'ellos dos fíes nacíes n'Asturies.
