“Dende neñu, siempres me xubía a lo más alto que podía, y esa pasión calténgola agora de mayor”. Fala Rubén Alonso, llangreanu de 36 años y residente na isla canaria de Tenerife dende los 11 años, que consiguió destacar gracies a les ablucantes imaxes que manga nes sos redes sociales coronando peñes y “roques” nes isles. Anque nun se considera “instagramer”, atropa casi 12.000 siguidores nesta rede social. Pero p'Alonso “los númberos nun son importantes, lo meyor ye la xente que pudi conocer nesti tiempu, sé qu'el mio perfil gusta poles fotografíes y porque soi bien temerariu y eso llama enforma l'atención, pero namás”.

Esti llangreanu fíxose viral n'internet va unos cinco años cuando publicó un vídeu nel que se xubía a una casa en ruines. “Llamáronme hasta de Los Ánxeles”, esplica al otru llau del teléfonu, asegurando que nunca buscó la fama. “Considérome deportista, aventureru, encántenme los paisaxes y el monte, ya intento tresmitilo nes semeyesque publico. Ye verdá qu'igual soi un poco temerariu, porque me gusta xubime a sitios estremos”, destaca. Practica atletismu desque yera pequenu y, nos sos ratos llibres, tamién fai musculación, “lo que m'ayuda muncho a la de facer esguilada nel monte”. 

Ente les sos fazañes, Alonso suel xubise a les peñes y “roques” qu'atopa nes isles, formaciones pedrices al pie de la mariña que suelen tener ente 40 y 60 metros d'altor. “Equí hai bien d'elles, y poca xente s'atreve a xubiles, pero al mio péstame garrar un monte en vertical y da-y duro”, apunta. Y pa xubiles, el llangreanu prefieraesguilar ensin cuerda, lo qu'él llama “risquear”, una práctica verdaderamente más peligrosa, “pero cola que me siento llibre”. “Amás lo más difícil nun ye xubir, daqué que puedes facer en diez o quince minutos, lo complicao ye baxar, yá que tienes que buscar el sitiu pa facelo lo más seguro posible”. De tolos murios naturales a los que xubió nos últimos años, esti mozu destaca ún de casi cuatrocientos metros d'altor conocíu como Las Ánimas, na península d'Anaga (Tenerife) “que ye impresionante”. Y como retu de futuru, yá plantega xubir otru “roque” allugáu en Gran Canaria, “que ta bien complicáu y téngome que tirame al mar a nadar p'algamalu, pero yá se va ver”. 

Y non solo xube peñes y “roques” en Canaries, tamién na tierrina , onde allega “cada vez que puedo, una y bones tola mio familia ta n'Asturies, anque depués cuando vengo, sobremanera dedícome a facer escapaes”. Ente los sos llugares favoritos n'Asturies ta Somiedu y la zona alta de Llaviana. “A los Picos d'Europa voi menos porque ta más acutao”, esplica. A pesar de venir davezu a Asturies, la crisis sanitaria del coronavirus retrasó estes visites porque “va dos años que nun voi per allá, pero tengo munches ganes de volver y ver a la mio familia”. Esto va asoceder, siempres que lu dexe la situación sanitaria, el próximu branu: “Nun sé inda en qué mes, pero esta vegada nun fallo”, sorraya.