Rozalén, Ara Malikian, Sidecars y Ptazeta van completar el cartelu del festival Metrópoli en Xixón, que se va desenvolver a lo llargo de xunu, xunetu y agostu con actuaciones na plaza de toros d'El Bibio y con un segundu escenariu na Llaboral. Unes actuaciones que s'axunten a les yá anunciaes d'artistes como Estopa, Vanesa Martín, Marlon o Taburete, y que van cuntar tamién colos shows de Nach y María José Llergó.

Va haber humor, con Martita de Graná y Goyo González, una de les fases clasificatorias de la batalla de gallos USN World Summer Cup y los más pequenos van tener el so espaciu nel Palaciu Revillaxixéu y la Colexata de San Xuan Bautista cola esposición Dinoworld llena d'animales prehistóricos. Amás, vuelvi la Comic Con ente'l 1 y el 4 de xunetu col cómic esclusivu Marvel pa coleccionistes y la presencia de los ilustradores Moderna de Pueblu y Salva Espín.

Asina lo anunciaron esti día los responsables del festival, Marín González y Suca García, xunto con Lara Martínez de Divertia. Va ser, primero de too, un eventu "seguru" anque con daqué más d'aforu que nos conciertos del añu pasáu si la situación sanitaria lo permite, y los interesaos pueden mercar les entraes na web de Metrópoli.