Ventitrés conceyos asturianos, casi un terciu del total, tán en “riesgu de despoblación” y la so viabilidá futura ta “seriamente amenaciada” si nun ganen habitantes, según les conclusiones del últimu informe añal del Bancu d'España, correspondiente a 2020, que se fizo públicu. Tolos conceyos que cuerren peligru de sumir pol esbarrumbe demográficu asitien nel interior de la rexón, na denominada “Asturies vaciada”, y destaquen pola so ruralidad. N'España son en total 3.403 conceyos (el 42 por cientu del total) los que tán en riesgu de despoblación.
Ente los conceyos asturianos en trance de sumir figuren cinco de la contorna oriental: Peñamellera Alta, Cabrales, Onís, Amieva y Ponga. Hai otros cinco de la zona central de la rexón: Quirós, Proaza, Teberga, Yernes y Tameza y Casu. La zona suroccidental asturiana ye la que más conceyos en riesgu de despoblación presenta, un total de trece: Taramundi, Vilanova d'Ozcos, Samartín d'Ozcos, Santalla d'Ozcos, Grandas de Salime, Pezós, Eilao, Villayón, Ayande, Ibias, Degaña, Somiedu y Balmonte.
Estos 23 conceyos sumen solo 21.599 habitantes, el 2 por cientu del total d'Asturies, pero algamen una superficie conxunta de 3.506,81 kilómetros cuadraos, lo que supón xusto un terciu del total de la rexón.
El Bancu d'España incluyó ente los conceyos en riesgu de despoblación a aquellos que la so población escayó ente 2001 y 2018, nos que los fallecimientos fueron superiores a les nacencies dende 2001 y nos que viven menos de 12,5 habitantes per kilómetru cuadráu.
N'Asturies hai otros cinco conceyos que tuvieron mui cerca de quedar incluyíos nesa llista. Son Boal, Peñamellera Baxa, Santiso d'Abres y Santo Adriano, que solo incumplen la condición referida a la densidá de población, y Sobrescobiu, que se “salvó” porque, según los datos del Institutu Nacional d'Estadística (INE), ganó 10 habitantes ente 2001 y 2018, pero que puede entrar na llista en cualquier momentu.
Nel ranking ellaboráu a partir de les condiciones establecíes pol Bancu d'España apaeceríen de siguío los dos conceyos más estensos de la rexón: Cangas del Narcea y Tinéu, que perdieron población y presenten crecedera vexetativa negativa, pero que tamién superen por poco'l mínimu referíu a la densidá poblacional.
La despoblación rural, que n'Asturies vien d'antiguu, ta viéndose agravada nos últimos decenios por una fonda crisis demográfica xeneral. Una recesión que provocó que solo 6 de los 78 conceyos asturianos ganaren población nel períodu analizáu pol Bancu d'España (2001-2018): Xixón, Uviéu, Siero, Villaviciosa, Llanes y el yá citáu Sobrescobiu.
La importancia del esbarrumbe demográficu y el so impactu na economía llevó al Bancu d'España a incluyir per primer vegada nel so informe añal un apartáu específicu sobre esti fenómenu.
Los 23 conceyos asturianos en riesgu de despoblación incluyense ente los que la so viabilidá taría “amenaciada na midida na que el so procesu secular de perda de población podría considerase irreversible y eventualmente desencadenar la so propia desapaición”, señala l'informe, qu'añede: “La desapaición d'estos conceyos podría representar coles mesmes una amenacia sobre'l mediu ambiente pol aumentu de quemes y un amenorgamientu de la biodiversidá”.
El diagnósticu d'España ye notablemente más esmolecedor qu'el del restu d'Europa, onde namás Finlandia, Estonia y Letonia rexistren una mayor proporción de conceyos en riesgu de despoblación. L'escenariu español nun diz col de países como Alemania, con solo un unu por cientu de conceyos en peligru, Italia (4 por cientu) o Francia (7 por cientu).
Facilitar el teletrabayu, midida indispensable pa revitalizar los conceyos rurales
L'informe del Bancu d'España sobre despoblamientu nun ufierta recetes concretes pa frenar esi fenómenu, pero sí encamienta arreparar n'otros países onde funcionaron les polítiques pa tornar la situación y revitalizar el mundu rural, como Francia, y onde s'apuesta por afalar los elementos que faciliten el teletrabayu, como la conexón a internet de banda ancha, el comerciu electrónicu, les enerxíes anovables o les actividaes venceyaes a la economía de los ciudadanos p'ameyorar la so calidá de vida y cubrir les sos necesidaes.
Les diferencies nel accesu a los servicios ente'l mundu urbanu y el rural ye otru de los aspeutos que resalta l'informe. Nel segundu hai peor provisión de los servicios; por casu, p'aportar al colexu, al consultoriu médicu, a una gasolinera o a un pabellón deportivu, los habitantes de conceyos rurales tienen de movese de media 22,6 kilómetros frente a los 2,15 de los que viven en zones urbanes. Pero'l percorríu ye entá mayor si'l conceyu ta en riesgu de despoblación: más de 30 kilómetros. Estos tamién sufren un “déficit significativu” d'accesu a los servicios financieros y dixitales, lo que resulta una torga tanto p'afitar población como p'atraela.