El 30 d'avientu de 2019 la Organización Mundial de la Salú (OMS) echó voz de l'apaición d'una neumonía d'orixe desconocíu na ciudá china de Wuhan. Añu y mediu depués, sigue ensin esclariar si dalguna especie animal trespasó a los humanos el coronavirus que causa'l SARS-CoV-2 o si ye un productu de llaboratoriu. Dieciocho afamaos científicos británicos y estadounidenses consideren “fundamental” saber cómo surdió'l covid-19, pa evitar futures epidemies y protexer a la humanidá. Nun artículu publicáu apocayá na revista “Science” esixen “más investigación” y dexen constancia de que “les teoríes de la lliberación accidental d'un llaboratoriu y el derrame zoonóticu siguen siendo vidables”. 

Los firmantes del artículu, investigadores de primer nivel n'instituciones como les universidaes de Cambridge, Yale y Harvard, cuestionen l'informe que se publicó'l pasáu mes de payares sobre l'orixe de la enfermedá, tres la visita d'una delegación de la OMS a China. Sostienen que ta basáu en datos y amueses arrexuntaos pola metá china del equipu y faen ver que, ensin nenguna certidume que respondiera claramente a nenguna de les dos hipótesis, la delegación de la OMS concluyó nel so informe que “yera bien probable” que la enfermedá fuera causada por una zoonosis y “desaxeradamente improbable” que se debiera a un escape d'un llaboratoriu. Solo en cuatro de les 313 páxines d'aquel informe, señalen, se plantegaba la posibilidá d'un accidente de llaboratoriu. 

Amás, recuerden que nel so día el director xeneral de la OMS, Tedros Ghebreyesus, consideró “insuficiente” l'atención qu'aquel informe-y diera a la posibilidá del escape del llaboratoriu. “Como científicos con esperiencia relevante, tamos acordies col director xeneral de la OMS, los Estaos Xuníos y otros 13 países, y la Unión Europea, en que ye necesariu y facederu llograr una mayor claridá sobre los oríxenes d'esta pandemia”, afirmen los firmantes del artículu de “Science”. 

Les dos hipótesis sobre l'aniciu de la pandemia tienen defensores y detractores ente la comunidá científica y afalaron a un cientu de teoríes conspiranoicas. 

En 2008, un grupu d'investigadores británicos y estadounidenses, ente los qu'había zoólogos, ecólogos y economistes, publicaron na revista “Nature” un artículu nel qu'informaben de que, ente 1940 y 2004, conseñárense 335 nueves enfermedaes infeicioses na población humana global. “Les enfermedaes infeicioses emerxentes son una gran amenaza pa la salú: el sida, el SARS, les bacteries resistentes a les melecines y el virus del Ébola alcuéntrense ente los exemplos más recién”, alvertíen yá daquella. El pasáu mes de marzu “Nature Medicine” publicaba un artículu científicu nel que los sos autores concluyíen que “el SARS-CoV-2 nun ye un diseñu de llaboratoriu o un virus fabricáu arremente”. 

En septiembre del añu pasáu la viróloga hongkonesa Li-Meng Yan espublizó un informe, del que se fixo ecu la revista “Redacción Médica”, nel que remana que “el SARS-CoV-2 amuesa característiques biolóxiques que son incompatibles con un virus zoonóticu natural”. El testu ta robláu por otros trés científicos y avaláu pola “Rule of Law Society”, una organización fundada por un magnate chinu, Guo Wengui, exiliáu n'Estaos Xuníos. Tamién Robert Redfield, que foi'l director de los Centros pal Control y la Prevención d'Enfermedaes n'Estaos Xuníos col presidente Trump, considera que covid-19 tuvo'l so orixe nun llaboratoriu en Wuhan.

Los más deportistes salieron del confinamientu con meyor salú mental


Les persones que realizaron más actividá física y de mayor intensidá mientres el confinamientu pola pandemia sufrieron menos síntomes depresivos y manifiesten un mayor bienestar emocional. Esa ye la conclusión a la que llegó'l Grupu d'Investigación Edafides (Educación, Actividá Física, Deporte y Salú) de la Universidá d'Uviéu, tres la realización de dellos estudios. Los estudios de los investigadores uvieínos, publicaos en delles revistes científiques internacionales, “confirmen el papel protector de l'actividá física pa la salú mental”. Los investigadores de la Universidá d'Uviéu analizaron los cambeos de pesu de resultes del cambéu de vezos d'actividá y alimentación mientres el confinamientu domiciliariu nuna amuesa de más de 4.300 individuos y llegaron a la conclusión de que paez qu'hai una conexón ente la obesidá, la depresión y l'alimentación. Amás, l'equipu comprobó que les persones “que practicaben regularmente n'actividaes físiques brengoses y moderaes manifestaben mayores niveles de resiliencia, afectu positivu y menores síntomes depresivos”.