Per vegada primera, la llingua asturiana va tener sitiu nel programa “Afinidades” del Ministeriu de Cultura. Esti programa busca “sofitar la escritura en toles llingües del Estáu ya impulsar l'actividá nes llibreríes independientes”. El Ministeriu de Cultura y Deporte, al traviés de la Dirección Xeneral del Llibru y Fomentu de la Llectura, convocó una nueva edición del programa d'animación llectora “Afinidades Electivas. Encuentros literarios en librerías para 2021”, na que per primer vegada inclúyese la posibilidá de que participen autores qu'escriben y trabayen n'asturianu. La incorporación d'escritores, traductores y ilustradores en llingua asturiana a esti programa acordóse na xunta que caltuvieron n'abril la conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García, cola directora xeneral del Llibru y Fomentu de la Llectura, María José Gálvez. Nesi alcuentru acordóse tamién la inclusión del asturianu nos “Encuentros literarios en IES, destinados a fomentar la lectura entre el alumnado de Secundaria”, y la presencia destacada de la lliteratura asturiana na Feria del Llibru de Frankfurt 2022, na qu'España va ser el país convidáu d'honor d'esta edición.
