Los trenes de mediu mundu “salen” de Xixón al traviés d'ArcelorMittal. Llínies de ferrocarril de cuatro continentes tán tendiéndose con raíles fabricaos na factoría que la multinacional siderúrxica tien en Veriña. Los veceros principales son empreses públiques de distintes naciones, con contratos de suministru a llargu plazu y dellos años de duración. Los principales pidíos nos que nos últimos meses ta trabayando'l tren de carril inclúin países europeos, pero tamién d'otros continentes como Canadá, México, Brasil, Emiratos Árabes Xuníos, Arxelia, Túnez, Exiptu, Perú, China y la India. El negociu acelera a una gran velocidá y, según les previsiones, va siguir faciéndol nos próximos meses. 

India ye ún de los principales pidíos qu'anguaño tien en cartera Arcelor, que lleva más de mediu añu mandando carriles al colosu asiáticu, la mayor parte d'ellos de 18 metros de llargor y otros de 13. Tán destinaos a modernizar la llarga rede ferroviaria nel subcontinente, proyectu que lleva años executándose. Y pa siguir. Bombai ye'l puertu de descarga d'estos materiales qu'Arcelor esporta per El Musel, magar el destín final d'esti aceru xixonés va n'ocasiones pa puntos tan alloñaos como dalguna de les provincies al norte de la India llenderes con Pakistán. 

La multinacional siderúrxica tamién acaba d'axudicase'l contratu pa la rehabilitación de la llinia ferroviaria tresoceánica que xune'l Golfu de México y l'océanu Pacíficu pel istmu de Tehuantepec, nel país azteca. Otru de los veceros importantes en Norteamérica ye Canadá, d'aú Arcelor recibe dacuando pidíos de carril de cabeza endurecida –qu'aguanta meyor les cargues pesaes y les temperatures baxes–, y ún d'ellos va sirvilu nos meses vinientes. 

Tocantes a Europa, ente los veceros habituales de la factoría xixonesa tán Finlandia, Polonia, Lituania, Francia y la mesma España, cuantimás, y en menor midida, Italia y Reinu Uníu. Apocayá tamién recuperó l'enfotu de Portugal, país que dexara de facer encargos va unos años, por mor de los problemes que surdieron nel tren de carril tres la modernización de les sos caxes de laminación, problemes superaos yá dafechu. 

El taller de la factoría de Veriña ye una xoya industrial que puede producir carriles d'hasta 108 metros de llargor, como los pidíos que tuvo apocayá pa Inglaterra o Italia. Trátase d'un tipu de carril que suel destinase a l'alta velocidá. Anque tradicionalmente'l tren de carril d'Arcelor na factoría de Veriña vieno fabricando principalmente pal mercáu européu, nos últimos años tamién llogró importantes contratos nel Norte d'África, Oriente Mediu, América y la India. Ún de los más sonaos fue'l de les 100.000 tonelaes pal tren d'alta velocidá a La Meca, n'Arabia Saudita. 

L'oxetivu de la empresa foi algamar les 350.000 tonelaes de producción nel tren de carril d'Arcelor, cifra que nun se llogró en nengún añu. Los meyores exercicios rondaron les 280.000 tonelaes. L'añu pasáu, la producción foi de 240.000 tonelaes y agora la empresa anunció a los sindicatos que va amenorgar per unos meses la plantiya nel taller, atribuyéndolo a un descensu na producción pola cayida de pidíos. El taller, que produz de manera continua tola selmana, con trés turnos diaries, va pasar a tar paráu mientres cuatro turnos completos per selmana; ensin actividá'l domingu y previsiblemente el llunes pela mañana, momentu que se va aprovechar pa entamar llabores de caltenimientu. 

Cinco trabayadores del área de laminación van dir pal tren d'alambrón, onde tamién se contratarán más eventuales pa que pase a trabayar ininterrumpidamente tola selmana. Anque paeciera qu'el alambrón va meyor que'l carril, trátase d'un cambéu coyuntural, por un alza nel preciu del alambrón, que'l so taller tien alta ocupación prevista hasta agostu. Magar la baxada actual nel de carril, el futuru d'esta instalación ta más afitáu debíu al llargu plazu nos contratos de suministru a los veceros. 

La competitividá del taller de carril tamién s'ameyoró cola implementación, nel primer trimestre d'esti añu, de la inyección de gas de coque nel fornu de calentamientu del tren de carril, que supón una meyora nos sos costos fixos y, na actualidá ta trabayándose tamién na implantación d'idees qu'ameyoren el procesu productivu. Amás de nel tren de carril, tamién se completó l'usu de gas de coque nel tren de chapa gruesa, una inversión que se fixo en paralelo a la d'inyección de gas de coque nel fornu altu B. Onde entá nun s'implementó la sustitución de gas natural pol de coque ye nel tren d'alambrón, nel que tamién ta previsto. 

Arcelor cunta con plantes de fabricación de carril, amás d'en Xixón, en Rodange (Luxemburgo), Dabrowa Gornicza y Chorzow (Polonia) y Steelton (Estaos Xuníos). La factoría de Veriña empezó a producir carril pa víes d'alta velocidá en 1990, coincidiendo col desenvolvimientu de la rede de l'AVE n'España. El segmentu de negociu más rentable anguaño son los raíles asimétricos de cabeza endurecida. La capacidá del taller pa producir carriles de cabeza endurecida na factoría ye de 110.000 tonelaes añales. Una cifra qu'asitia a Xixón na vanguardia mundial de la industria ferroviario. Enclín que, llueñe de frenase, va a l'alza.