Arlon, una de les ciudaes más antigües de Bélxica, comparte pasáu romanu con otres urbes europees como Braga o Sremska Mitrovica, en Serbia. Tamién con Xixón o Mérida, que formaron parte de lo que foi la ruta de la Vía de la Plata. Lo que tamién tienen de mancomún toes estes ciudaes ye que formen parte de la Rede de Cooperación del Patrimoniu de Víes Romanes d'Europa, lo que se conoz como'l “Iter Romanum”, que la so esposición itinerante inauguróse esti día nel muséu Villa Romana de Veranes, en Xixón, siendo visitable de forma gratuita hasta'l 19 de xunu

L'oxetivu del proyectu ye espublizar el ricu legáu cultural al traviés del legáu arqueolóxicu d'estes ciudaes col porgüeyu de potenciar tamién el turismu. Asina lo reconoció la directora de los Museos arqueolóxicos de Xixón, Paloma García. “Ye un trabayu tresversal, de cooperación ente les alministraciones, onde'l turismu y la cultura tán inxeríos, porque una cosa nun s'entiende ensin la otra”, esplicó. L'amuesa, que yá ye visitable, alcuéntrase nel edificiu principal del muséu Villa Romana de Veranes, onde debuta enantes de tomar pel camín d'otres ciudaes primero del entamu del branu. Va asitiar en Mérida, Medina de las Torres, Zamora y La Bañeza. Tamién va pasar per Braga, en Portugal, y el restu de ciudaes que formen parte del “Iter Romanum”. Diches ciudaes son Alesia (Francia), Aquilea (Italia), Arlon (Bélxica), la citada Braga (Portugal) y Sremska Mitrovica (Serbia). A toes elles hai que sumar aquelles urbes que formen parte de la Rede de Cooperación de Ciudaes na Ruta Vía de la Plata, ente les que se cunta Xixón. La esposición compónenla dellos cartelos esplicativos del ricu patrimoniu del que puede esfrutase nestes ciudaes.

La rede de museos arqueolóxicos de Xixón ta xugando un papel decisivu a la de reivindicar el legáu de la ciudá. Tal que adelantró LA NUEVA ESPAÑA, va liderar esti añu un ambiciosu proyectu de recuperación de la Campa Torres, el xacimientu que dio orixe a Xixón, depués de dos décades d'inactividá. “Nun se puede espublizar conocencia de fai 20 años. Va ser un aciertu pa Xixón y pa los xixoneses porque va sirvir p'actualizar la conocencia que se tien del orixe de la ciudá”, apunta García. De cara al branu, la rede tien camentaes actividaes dinámiques tales como representaciones artístiques y monólogos. A la inauguración d'esti día tamién asistieron los conceyales de Turismu, Santos Tejón, y el de Cultura, Manuel Vallina, según Luisa Ferrero, responsable de Ruta Vía de la Plata