El númberu esactu d'horros qu'hai n'Asturies yera ún de los grandes “misterios” rexonales. Los especialistes nesti elementu etnográficu que caracteriza'l paisaxe rural asturianu siempre ufiertaben datos aprosimaos. La Conseyería de Cultura ufiertó esti día una cifra esacta. Na rexón hai 14.566 horros con protección patrimonial. 

Esti númberu ye la base sobre la qu'empezar a trabayar pa caltener ún de los iconos de la cultura tradicional asturiana visto que'l so simbolismu y valor como elementu identificador del paisaxe del Principáu nun lu ta salvando del desaniciu. Cola llegada de les neveres y los arcones refrixeradores, estes tenaes elevaes perdieron la so función como almacenes d'alimentos, ventilaos y llibres de royedores, y empezaron a convertise, nel meyor de los casos, en cuartos trasteros. L'horru dexó de curiase porque yá nun yera aquella imprescindible despensa de la casería.

La Conseyería de Cultura trata de revertir esa situación col desenvolvimientu d'una nueva normativa que dexe dar al horru una nueva funcionalidad, acorde colos usos y costumes del sieglu XXI. Pa ello constituyóse la llamada Mesa del Horru, na que distintos espertos apurren les posibles soluciones por que sigan de pies estos elementos tan distintivos d'Asturies. El primer pasu foi desenvolver, a lo llargo de 2020, una “base de datos unificada”. La cifra resultante son los mentaos 14.566 horros, paneres y cabazos protexíos qu'apaecen incluyíos nos catálogos urbanísticos municipales. Según la Conseyería de Cultura “esti trabayu constitúi'l primer aproximamientu solvente y rigorosu pa conocer el númberu d'estos elementos etnográficos n'Asturies”. Con too y con ello, esta cifra va poder medrar, avisen dende'l departamentu qu'encabeza Berta Piñán. “El fechu de que dellos conceyos entá nun realizaren el llabor de catalogación del so patrimoniu nesti campu va alzar ensin dulda esti censu”, indiquen dende Cultura. 

La Mesa del Horru yá cunta con un borrador pal entamu del cambéu normativu que va regular d'equí p'arriba l'usu de los horros, cabazos y paneres esistentes n'Asturies. L'oxetivu ye allumar usos alternativos que, según alvierte la Conseyería, “tendrán de respetar los valores culturales del elementu etnográficu y favorecer el so caltenimientu”. Enagora solo hai propuestes. Una de les más demandaes polos propietarios de los horros, la que consideren clave pa la so pervivencia, sería permitir l'usu de los horros como vivienda o habitación complementaria, daqué que contemplaría esta nueva reglamentación, pero con restricciones. 

La reforma que la Mesa del Horru ta entamando non solo va afectar a los usos que se-y puedan dar al horru. “El cambéu normativu que plantega la Conseyería dexaría amenorgar notoriamente los trámites d'autorización pa obres de caltenimientu y conservación que caltengan les característiques orixinales d'horros y paneres”, esplica la Conseyería. Amás, según el departamentu de Piñán, “el borrador propón tamién qu'estes actuaciones puedan ser autorizaes directamente poles alministraciones locales, ensin necesidá d'un informe específicu de Patrimoniu Cultural, siempres que s'afayen a una serie d'indicaciones que se van recoyer na mesma normativa”.

Xunto a una reforma alministrativa pa facer más axilosos los permisos d'igua de los horros, Cultura tamién quier habilitar un almacén de la Fundación Cetemas p'allugar “pieces procedentes d'horros y paneres desmontaos de resultes de declaraciones de ruina, derrumbes o otros accidentes, que se van poner de forma gratuita a disposición d'interesaos n'aprovechar estes pieces na restauración d'otros elementos etnográficos d'asemeyada naturaleza”. 

La Mesa del Horru foi una iniciativa que tomó la Conseyería en febreru de 2020 y ta integrada por espertos, profesionales y representantes d'asociaciones y entidaes de distintos ámbitos rellacionaos col estudiu, la restauración y el caltenimientu d'esti patrimoniu etnográficu. Hasta la fecha axuntóse dos vegaes. 

L'arquiteuta Cristina Cantero forma parte de la Mesa como representante de l'Asociación Asturiana d'Antropoloxía y Patrimoniu Etnolóxicu. Cantero esplicó esti día a LA NUEVA ESPAÑA que “tamos entá determinando cómo sería l'algame, agora nun hai una llei nin un reglamentu. Ta viéndose el marcu nel que se va a desenvolver. Ye un procesu que tarda”. Cantero esplicó que “l'oxetivu ye abrir la puerta a nuevos usos, pero hai que concretar cómo y ta nun estáu larvariu. Ta trabayándose nello. Preferimos dar pasos curtios, pero en firme, anque se tarde un poco más. Que sía inapelable y qu'haya consensu social y dea garantíes” resumió.

La ruina que se vía venir nel horru escaecíu d'Olivares


Los vecinos d'Uviéu que frecuentaron la so zona rural, tan desconocida como próxima, mientres esta pandemia diéronse de focicu con una realidá que se vía venir. Les ruines d'un horru, qu'acabó cayendo pol pasu del tiempu y, sobremanera, pol olvidu tamién apreciable na finca que remata ún de los estremos del Monticu d'Olivares, na semeya, enantes de tomar pel camín que lleva a cerca de Les Maces.

La ruina que se veía venir en el hórreo olvidado de Olivares | J. A. A. E. F.-PELLO