El centru de cría del urogallu de Sobrescobiu avanza nel so oxetivu d'evitar la desapaición de la especie al traviés de la meyora xenética. Asina lo esplicó esti día'l director xeneral de Mediu Natural y Planificación Rural, David Villar, quien dio cuenta de que científicos y técnicos especializaos na fauna montesa tuvieron recoyendo material xenético nel centru coyán pa llevar a cabu l'encruz ente ocho femes y seis machos. Primeramente realizáronse analises xenéticos pa qu'esista la menor consanguinidá posible ente estos exemplares. Coles mesmes, Villar dio por segura la continuación del trabayu nel centru de cría de Sobrescobiu magar la puesta en serviciu esti añu d'otru centru de característiques asemeyaes en Llión. Aseguró que “tenemos oxetivos distintos, anque toos trabayamos pa una estratexa nacional de caltenimientu de la especie”.
Tocante al proyectu científicu desenvueltu en Sobrescobiu, completáronse dellos ciclos de recoyida de dosis seminales que yá fueron procesaes y conxelaes. El material recoyío caltiense nel Centru de Biotecnoloxía Animal del Serviciu Rexonal d'Investigación y Desenvolvimientu Agroalimentariu (Serida) del Principáu, que ye ún de los principales reservorios de material xenético d'estes aves de tou'l país. Nos próximos meses, la investigación va dexar “afondar na conocencia de la especie y fortalecer l'intercambiu d'esperiencies ente los distintos equipos que participen na estratexa”.
El proyectu ta coordináu pol equipu del doctor Julián Santiago, del Departamentu de Reproducción del Institutu Nacional d'Investigación y Tecnoloxía Agraria y Alimentaria (INIA), un organismu públicu adscritu a la secretaría xeneral d'Investigación del Ministeriu de Ciencia ya Innovación. Amás, participen especialistes veterinarios del área de Selección y Reproducción Animal del Serida, técnicos de la Xunta de Castiella y Llión y del Ministeriu de Transición Ecolóxica, xunto al responsable del centru de cría del urogallu de Sobrescobiu, Ramón Balsera.
Per otru llau, el centru coyán va desenvolver esti añu un nuevu programa de reproducción en cautividá que va dar continuidá a los llabores empecipiaos l'añu pasáu. Hasta agora los distintos ensayos apurrieron amueses pa estudios xenéticos y permitieron establecer patrones hematolóxicos y bioquímicos del faisán montés. Tamién se fixo l'analís de la microbiota intestinal y d'enfermedaes infeicioses y parasitaries que nun sería posible entamar nel mediu natural. Coles mesmes, creóse un bancu de xermoplasma del que formen parte los trabayos de toes estes últimes selmanes.
Ramón Balsera señala que la reproducción en cautividá del urogallu “acarreta con importantes dificultaes”. Ello ye que l'añu pasáu namás punxeron güevos dos pites de les ocho que tien el centru. D'un total de trece güevos, namás llegaron a nacer cuatro pollos, pero nun se llogró la so supervivencia.
Esti añu, como esplicó Balsera, “dos de les femes tamién punxeron güevos y tamos a la espera de ver si son vidables”. El centru de cría de Sobrescobiu tien ocho femes y siete machos. La población de faisán montés n'Asturies ye de sesenta exemplares.
Per otru llau, David Villar avanzó que l'hospital d'animales de Redes va abrir finalmente les sos puertes mientres esti branu. “Esta primavera tuvimos reparando les estroces que provocara la envernada, fiximos el zarru perimetral, y tamos col procesu de compra del conteníu pa que pel branu podamos empezar a traer los animales dende L'Infiestu hasta Redes”, sorrayó
