Viaxar ye una esperiencia qu'empieza muncho primero de llegar al destín, y que, gracies al enfotu y l'amor pel mundu clásicu de Juan Jesús Alonso, ye tou un cantar a la guapura y la sabiduría. Alonso, collaborador de LA NUEVA ESPAÑA, arrexunta nuna guía de viaxe a Grecia los artículos que fueron publicaos orixinalmente nesti diariu, al traviés de los qu'ufierta “una esperiencia previa, una inmersión nel país al traviés de la filosofía, la hestoria y los mitos”, esplica. Pa que, cuando llegue la hora de ser turista, “yá vaiga ún trescaláu del espíritu griegu”. 

Alonso, profesor de Filosofía nel IES Doña Jimena de Xixón, cuadrelló tamién nos sos artículos una “trampa” pa engaloyar a los llectores y reclutalos pa la causa del mundu clásicu. “Ye imposible nun amar l'Antigua Grecia, creo que ye lo más fácil del mundu”, sentencia convencíu de que se ta dando un regresu a les fontes clásiques dende munchos puntos de vista. “Y más con esta crisis que tamos viviendo: na batalla de Salamina'l trunfu foi posible gracies a los remeros, lo más baxo na escala social de la dómina, y lo mesmo asocede agora, cuando los héroes d'esta pandemia fueron los caxeros de supermercáu o los llimpiadores. Ehí anda la vixencia de la filosofía griega”, sentencia. 

Tres paseos griegos con Aristóteles y otros viajes filosóficos, históricos, míticos y turísticos a Grecia” ye por ello un llibru nel que cueyen munchos planteamientos, dende una llamada a la conocencia de los llugares que s'amuesen hasta una repasada pola conocencia d'espacios como l'Academia, el xardín y el Licéu n'Atenes, el llugar qu'ocupó la tumba de Aristóteles, un paséu per Tesalónica, una visita al llugar nel que nació Alexandro Magnu y otros intereses como la busca de les buelgues de Leonard Cohen pola isla dHydra, onde l'autor escribió'l cantar “So Long, Marianne”, el so chigre favoritu o'l requexu nel qu'avezaba a sentar. 

“Ye un llibru pa lleer primero de llegar a Grecia, pa ponese pingando del so espíritu, pero tamién puede llevase como guía nel equipaxe pa repasar los llugares que percorrí en cinco años de viaxes. Porque tamién doi conseyos pa facer turismu y esfrutar”, reconoz con un chisgu. 

Y teniendo en cuenta amás que “Grecia siempre sal al rescate”, recuerda Alonso. Abondo ye que, l'héroe Aquiles tamién tuvo confináu, anque nuna isla con vistes al Exéu, como Sócrates, que tuvo nuna cárcel d'Atenes enantes de beber la cicuta, y mentanto siguió dialogando colos sos discípulos, faciendo entrugues y esforciándose por aprender a tocar una melodía cola flauta. “Grecia siempre tien daqué qu'enseñanos, siempre ta d'actualidá”, recalca l'autor. 

Con toa Grecia en bolsu, el viaxe ta al algame de toos.