Un grupu d'investigadores de la Universidá d'Uviéu trabaya nel desenvolvimientu d'un nuevu modelu sintéticu basáu na “química sostenible o verde”. Les melecines que tomamos, la ropa que vistimos o los ordenadores colos que trabayamos prodúcense a partir de procesos químicos altamente contaminantes, como alvierte'l profesor Joaquín García. ¿Y por qué? Porque na mayoría de los casos usen los llamaos disolventes orgánicos volátiles. 

“Estos productos son tóxicos ya inflamables y constitúin anguaño un seriu problema visto qu'esisten regulaciones estrictes pa controlar la so producción, usu y eliminación”, comenta ún de los científicos principales del grupu Química Sintética Sostenible. Poro, añede García, esiste “una necesidá acuciosa por buscar nueves rutes de síntesis química que puedan amenorgar o preferiblemente desaniciar la xeneración de borrafes”. 

Alejandro Presa Soto, otru investigador de la Facultá de Química, diz que la entruga que pretende responder el so grupu ye la siguiente: “¿Podemos rediseñar el futuru de la química sintética al traviés de metodoloxíes más sostenibles nel sieglu XXI?”. La respuesta ye afirmativa. “Ta claro que nun esiste la reacción química ideal, pero sí que podemos dar pasos p'hacia una química más sostenible utilizando, por casu, reacciones que nun xeneren borrafes contaminantes y feches en disolventes biodegradables con escasa buelga ecolóxica”, sorraya. Una de les llínies nes que trabayen consiste nel usu d'estos medios de reacción sostenibles pa la captura y reutilización de gases contaminantes, como'l dióxidu de carbonu.