Yera una bomba de reloxería y finalmente españó. La relación pesquera entre la Unión Europea y Noruega, que magar les tiranteces añales diba calteniéndose, arreventó. El país nórdicu autoasígnase una cuota de xarda de 298.299 tonelaes pa esti añu, lo que supón apoderase d'un 35% del total disponible y amontar un 55% les sos posibilidaes de captura. Faelo, aleguen, “por cuenta de la falta d'alucerdu col bloque comunitariu, Isles Feroe y el nuevu país que dende finales del añu pasáu forma parte de la ecuación: Reinu Uníu”. Pa poner en valor lo que supón el cupu que s'esquiñona Noruega, ye abondo dicir qu'España dispunxo en 2020 (últimu añu enantes del brexit) d'una cuota de xarda de 34.708 tonelaes que foi partida entre les flotes de les comunidaes del Cantábricu y Noroeste. 

Magar que l'alloñanza de Noruega podría facer pensar que la problemática de la xarda neses agües nórdiques nun incumbe a los pescadores asturianos, lo cierto ye que sí podría acarretar consecuencies. Esto ye asina porque si Noruega consolida la so pretensión acaparadora, Europa dispondría de menos tonelaes que partir cuando se resuelvan los cupos de 2022, y a menor tarta, lóxicamente, menores cachos pa cada país, entre ellos España y, poro, cada comunidá con fachada al Cantábricu. 

Conocedor de la maniobra de los noruegos, el sector pesqueru español glayó al altu la lleva y apura midíes. “Lo de la xarda atenta contra la sostenibilidá del stock y contra eso namás se pueden tomar midíes sancionadores”, reclama'l director xeneral de la patronal pesquera europea, Europêche, el vigués Daniel Voces, que recuerda que lo qu'asoceda nesti puntu de les conversaciones entre toles partes “va ser definitivo”. 

La xarda ye una especie que s'esparde dende'l norte del Atlánticu hasta'l sur européu, polo qu'afecta a distintos estaos costeros. Dende 2014 la UE, Noruega y Feroe axusten cada añu la cuota total a partir ente les trés partes (Islandia, Rusia y Groenlandia van por llibre). La situación camudó radicalmente cola incorporación d'otru país tres la desconexón de Reinu Uníu del bloque comunitariu. “Noruega ta camudando la so actitú p'hacia la UE dende entós. Ye claramente un efectu colateral del brexit”, esplica Voces. 

Magar que'l ministru noruegu de Pesca afirma qu'el so Gobiernu sigue “trabayando por un alcuerdu qu'abarque a tolos estaos costeros”, lo cierto ye que Noruega s'apoderó d'un 35% del total almitible de captures (TAC) de la especie, que pa España taba prevista en 28.400 tonelaes pa esti añu. 

El movimientu de Noruega nun ye nuevu. A finales del añu pasáu decidió, tamién unilateralmente, apoderase de parte de la cuota de bacaláu de la zona de Svalbard asignada a la UE pal so propiu beneficiu, quitándo-y 10.500 tonelaes a los Estaos miembros de les 28.431 iniciales. 

La situación col bacaláu yá taba tirante, pero l'apropiación de la xarda acabó por escosar la paciencia de los pescadores europeos. “Europa tien de reaccionar enzancando la importación de productos pesqueros noruegos con aranceles o quitando a esi país los privilexos aduaneros que tienen”, avisa Voces, que pide “una señal bien fuerte” a la UE. “Lo que pidimos ye una reacción clara”, insiste'l responsable d'Europêche.