Los 8 del Estatutu, los políticos y xuristes que redactaron fai casi cuarenta años el corpus xurídicu que regula l'autonomía del Principáu d'Asturies, van recibir la próxima Medaya d'Oru d'Asturies, que se va entregar nel viniente mes de setiembre por cuenta de la celebración de la fiesta rexonal.

Adrián Barbón aprovechó esti día l'alderique amenáu na Xunta Xeneral pola vocera de Ciudadanos, Susana Fernández, sobre la reforma del Estatutu que pretende impulsar el presidente del Principáu, pa “anunciar” la concesión de la máxima distinción d'Asturies a los ocho padres del Estatutu d'Autonomía d'Asturies. “La nuesa propuesta ye que la Medaya d'Oru, con calter colectivu, sía otorgada a la Comisión de los 8, qu'ellaboró l'anteproyectu del Estatutu d'Autonomía d'Asturies”. El Presidente esplicó que se va a plantegar a esi grupu que dicha distinción “lluza depués na Xunta Xeneral del Principáu, sede de la soberanía popular asturiana y onde realmente se recuperó la nuesa autonomía política”.

Barbón citó a los integrantes d'aquel equipu que participó nel primer Estatutu autonómicu d'Asturies.Trátase de “Francisco Sosa Wagner y Bernardo Fernández, pol PSOE; Juan Bautista Fernández Fidalgo y Juan Caseru Lambás, pola UCD; Ignacio de Otto, por desgracia fináu, y Francisco Bastida, pol Partíu Comunista d'Asturies; Juan Luis de la Vallina Velarde, tamién fináu por desgracia, al que sostituyó dacuando José Luis Martínez López-Muñiz y José Manuel Riesco Morán, por Coalición Democrática”.

“Creo que ye un xestu hacia esta Cámara y hacia l'autonomía política d'Asturies que sían la Medaya d'Oru nesta ocasión, concluyó Adrián Barbón. Dalgunos de los consideraos “padres” del Estatutu d'Autonomía yá fueron distinguíos con honores autonómicos anque a títulu personal, como foi'l casu de Juan Luis de la Vallina Velarde, al que se-y concedió, tamién a títulu póstumu, la Medaya de Plata d'Asturies nel añu 2011.  

L'aprobación del Estatutu d'Autonomía va cumplir n'avientu próximu 40 años, anque los trabayos previos de la redacción entamaron y fixéronse con anterioridá, ente 1979 y 1980. Dende entós foi oxetu de reformes n'aspeutos puntuales pero l'únicu intentu pa entamar una revisión en fondura del mesmu acabó resultando baleru en 2008, magar que les negociaciones ente'l PSOE y el PP taben bien avanzaes. La reconocencia de la capitalidad d'Uviéu foi ún de los asuntos nos qu'allancó.