El berru d'allegría de Miguel Ángel Roldán retumbó el 31 de mayu nos Picos d'Europa a les 15.15 hores, al llegar al cume del Urriellu. El so feble filu de voz habitual, por cuenta de la Esclerosis Llateral Amiotrófica (ELA) que carez, sonó atronador y desgarrador, de los que toquen l'alma. El retu físicu taba llográu, tres cuatro hores y cuartu d'un esfuerzu sobrehumanu. Acababa de convertise nel primer enfermu d'ELA que llegaba a esti altu. El cordobés, de 41 años, quería dar visibilidá a la so dolencia y reclamar mayor atención sobre ella por que s'invierta n'investigación. Esi oxetivu tamién lu consiguió. Más de 11.000 persones llegaron a conectase a la retresmisión en directu que realizaron al traviés d'internet.

Miguel Ángel Roldán, enfermu d'ELA, corona l'Urriellu tres un emocionante ascensu de cuatro hores Sacalalenguaela

La espedición adoptó'l nome de “Urriela”, combinando na denominación la del Picu Urriellu col de les iniciales de la enfermedá. La iniciativa forma parte del proyectu “Los 5 gritos contra el ELA”. Cuatro persones que carecen esta enfermedá dexenerativa tán protagonizando estes fazañes, magar les graves llimitaciones físiques que-yos va provocando la dolencia

Colo asocedío güei nel cumal del Urriellu, son yá trés los “berros” o retos cumplíos. El primeru denominóse “Dar Dar ELAntártia” (2019), el segundu “TeidELA Ruta 04” (2020), que tamién protagonizó Miguel Ángel Roldán, y súmase el d'esti día, el “UrriELA”

A Miguel Ángel Roldán, conocíu como “Mikel”, diagnosticáron-y ELA va trés años, pero nun se rindió. Ye preparador físicu y profesor d'Educación Física y practicó Triatlón nel pasáu. La enfermedá afécta-y a la fala, a les manes y brazos, pero él sigue ensin rindise. A pesar de les dificultaes de movilidá, superó'l retu de xubir a 2.519 metros, convirtiéndose nel primer enfermu d'ELA en xubir al altu del Picu

Dende la Vega d'Urriellu setíense voces constantes d'ánimu que-y glayaben “Vamos Mikel”. A les qu'él respondía animando al so equipu y a él mesmu. Nun foi fácil aceptar el diagnósticu, pero propúnxose facer tou lo que tuviera nes sos manes pa dar visibilidá a toles persones que tán pasando polo mesmo y que precisen que s'investigue pa evitar que sía una patoloxía mortal. 

“Soi bien afortunáu”, dicía Roldán al averase a la imaxe de piedra de la Virxe de Les Nieves qu'espera a los escaladores nel cumal del Urriellu. Cuando llegó tocóla coles dos manes, agachó la cabeza y la emoción invadiólu consciente de qu'acababa de facer hestoria y llográralo con too y con ello y contra toles dificultaes. “Mirái onde toi. Sois los meyores del mundu. Gracies de corazón”, repitía-yos una y otra vez a les persones que lu acompañaben nel Picu.

Miguel Ángel Roldán y el so equipu na Vega d'Urriellu.

Escoyeron la cara Sur de la montaña. Concretamente la vía conocida como Directa de los hermanos Martínez. Tuvo acompañáu en tou momentu de profesionales consolidaos y conocedores del terrén que-y dieron ánimos y sofitu.Arrodiáu de los meyores pa llograr la so meta. Diba atáu a Fernando Calvo, espertu guía de monte asturianu, y a José Carlos Tamayo, con una reconocida trayectoria como escalador. 

Pero había munches más persones espertes y profesionales qu'ayudaron al ésitu de la espedición, tanto nes cordaes que xubieron al cumal col equipu de grabación –compuestu por cuatro cámares y un dron– como'l restu d'escaladores ente los que s'alcontraben Unay Llantada,Turenno Rodríguez, Alan Maygray, Fernando Novales y César García Gil, ente otros. La espedición tamién cuntó col sofitu del helicópteru de la Guardia Civil y con efectivos del Grupu de Rescate ya Intervención en Monte (GREIM). 

Roldán llegó unos díes primero, de tarde, al abellugu del Urriellu, onde tamién cuntó col sofitu y la loxística del so personal. El sábadu pela mañana, primero de salir hacia la base del Urriellu recibiólu l'alcalde de Cabrales, José Sánchez. La organización y producción audiovisual corrió al cargu de Dar Dar y actuaron como comentaristes de la fazaña Kepa Lizárraga y Pablo Olmos

La emoción marcó dende la once de la mañana toa esta gran aventura. Sobre les trés y cuartu de la tarde, yá nel altu taba Miguel Ángel Roldán y con él tolos enfermos de ELA del mundu.