Pasase un cursu enteru repitiendo divisiones y multiplicaciones yá “nun tien sentíu” y, amás, ye una “perda de tiempu”. Dícenlo espertos de toa España nun documentu qu'unviaron al Ministeriu d'Educación y que sienta les bases de les “nueves” Matemátiques col porgüeyu de que se tengan en cuenta na reforma del currículu escolar que prepara Isabel Celaá, tres l'aprobación de la LOMLOE. “Ye la primer vegada que nos punximos d'alcuerdu toles sociedaes científiques y profesionales de matemátiques del país sobre cómo creemos qu'hai qu'estudiar esta asignatura en colexos ya institutos”, resalta'l profesor de la Universidá d'Uviéu Luis José Rodríguez Muñiz, que ye ún de los trece autores –l'únicu asturianu– del testu. 

Principalmente, esplica Rodríguez, el documentu ellaboráu pol Comité Español de Matemátiques (CEMat) lo que pide ye que los númberos s'entamen dende'l puntu de vista del “razonamientu” y el “resolvimientu de problemes”. Ye dicir y dicho con otres palabres, hai que dexar de llau los procesos de reproducción o repetición, que “gasten munches hores” y qu'apurren más bien poco. “Claro qu'hai que saber lo que ye una división y una multiplicación, pero nun podemos pasanos tol cursu repitiendo estes operaciones. Trátase d'aprender meyor y les hores qu'hasta agora se destinaben a esi trabayu mecánicu, emplegales pa entender meyor les divisiones y les multiplicaciones, de xeitu que los alumnos sepan cuándo hai qu'utilizales y resolver asina problemes”, detalla Luis José Rodríguez que ye, dende 2018, presidente de la Comisión d'Educación de la Real Sociedá Matemática Española.

Luis José Rodríguez Muñiz.

Los espertos nacionales recueyen nel documentu “la gran revolución qu'esperimentaron les Matemátiques nos postreros cincuenta años, col surdir de los ordenadores”, polo que sorrayen que'l nuevu currículu “tien de contemplar l'usu de la informática”. Nesti sen, dicen que “la tecnoloxía ye esencial na enseñanza y l'aprendizaxe de les Matemátiques” y sostienen qu'ún de los retos ye “conectar la matemática escolar cola programación”. 

El profesor asturianu recalca que'l currículu de l'asignatura en Secundaria y Bachilleratu precisa una “actualización”. Tamién, apunta, “hai que facelu más llixeru, pero más fondu”. “Trátase de que los alumnos estudien menos, pero estudien en fondura”, esclaria. Dellos exemplos de práctiques que convien amenorgar nes etapes más cimeres son la manipulación d'espresiones alxebraiques –“¿De qué sirve simplificar y simplificar si va facelo un ordenador y aporta más bien poco?”–, la realización de funciones o cálculos a mano –“Yá tenemos los móviles; lo más útil ye facer entrugues sobre eses funciones”–, l'estudiu de definiciones de xeometría –“Tenemos que centranos n'interpretar eses definiciones”–, o'l desenvolvimientu del cálculu estadísticu –“De poco sirve pidir a los alumnos que calculen la media, la mediana y la moda”.

Pela so parte, n'Infantil y Primaria, el currículu escolar nun ye malu, sicasí, hai “un problema d'implantación práctica”, afirma Luis José Rodríguez. “Atopamos inda güei a un montón de profesores que manden facer fueyes de cuentes a los sos estudiantes, cuando eso yá ye daqué que tendría de tar superáu”, opina. Esti intentu de da-yos un valtu a les Matemátiques nes escueles pretende facer esta asignatura más atractiva y útil pa los alumnos, teniendo en cuenta amás el valor que tien pa la vida. El famosu informe PISA, na so edición de 2021, señala la “necesaria capacidá d'un individuu de razonar matemáticamente y de formular, emplegar ya interpretar les Matemátiques pa resolver problemes nuna amplia variedá de contestu de la vida real”, remarquen los autores del trabayu unviáu al Ministeriu. 

Nel testu, los espertos falen de grandes idees matemátiques (patrones, modelu, variable, relaciones y funciones, movimientos y tresformamientos, distribución, incertidume, magnitú...), que, espliquen, pueden trabayase de manera recurrente pero de distinta forma en función de cada nivel. “Por exemplu, en relación a la variable nós proponemos introducir yá l'álxebra temprana en Primaria. Nun tamos diciendo que los neños se pongan a trabayar cola ‘x’, sinón buscar patrones, formes de xeneralizar eses variables...”, detalla Luis José Rodríguez, profesor del departamentu d'Estadística ya Investigación Operativa y Didáctica de les Matemátiques. 

La revolución de les Matemátiques que los profesionales quieren que llegue a les aules llueu “va ayudar a los que van más avanzaos y a los que van más atrasaos”. “Atiende a la diversidá”, opina Rodríguez. “El que nun sepa multiplicar, nun va aprender por muncho que repita la operación. Y l'alumnu que yá lo sepa, con esi tipu d'exercicios lo único que vamos consiguir ye que-y xenere aburrición y desapegadura”, razona l'asturianu.